Forca e Sigurisë së Kosovës (FSK) ka hyrë në fazën përmbyllëse të tranzicionit 10-vjeçar, që synon transformimin e saj në një ushtri me kapacitete të plota. Sipas ministrit në detyrë të Mbrojtjes, Ejup Maqedonci, procesi i transformimit po ecën më shpejt se parashikimet fillestare, ndërsa përfundimi i këtij tranzicioni është planifikuar për vitin 2028.
Në përputhje me standardet e NATO-s, FSK po intensifikon përpjekjet për armatosje me pajisje moderne dhe të sofistikuara, përfshirë armatim të rëndë, mjete luftarake dhe helikopterë ushtarakë. “Flota e helikopterëve dhe artileria fushore janë prioritet gjatë kësaj faze. Jemi në kontakt të ngushtë me SHBA-në dhe partnerët e tjerë për të siguruar pajisjet në kohën e duhur”, deklaroi Maqedonci.
Ai theksoi gjithashtu përparimin në aspektin e përforcimit të artilerisë dhe shtimin e njësive të reja, përfshirë ato që operojnë me fluturake pa pilot. “Kemi në përdorim dronët Bayraktar, sisteme të artilerisë me zjarr indirekt, mortaja dhe pajisje të tjera moderne që tashmë janë pjesë e operimeve të FSK-së”, shtoi ai.
Mundesh me e lexu edhe…
Megjithatë, përdorimi i dronëve Bayraktar në hapësirën ajrore të Kosovës kërkon koordinim me KFOR-in, pasi ky i fundit vazhdon të ketë kontrollin e hapësirës ajrore. Kjo ka nxitur kërkesa për ndryshime në këtë drejtim.
Ish-komandanti i FSK-së, Kadri Kastrati, ka theksuar nevojën për transferimin gradual të kompetencave nga NATO te institucionet e Kosovës. “Është e nevojshme të formohet një komision që do të nisë bisedimet me Brukselin dhe KFOR-in për t’i dhënë FSK-së kompetenca më të plota në menaxhimin e hapësirës ajrore,” u shpreh Kastrati.
Në përfundim të këtij tranzicioni, Forca e Sigurisë së Kosovës pritet të numërojë mbi 7,500 trupa – 5,000 ushtarë aktivë dhe 2,500 rezervistë – duke e pozicionuar si një forcë tërësisht funksionale dhe të gatshme për sfida të sigurisë kombëtare dhe ndërkombëtare/RTK/Katror.info
