Të gjithë e dimë që të ushtrohemi rregullisht është e rëndësishme për shëndetin, por gjetja e motivimit shpesh është sfiduese. Lodhja, angazhimet e përditshme dhe mungesa e energjisë na bëjnë të mendojmë dy herë para se të ngrihemi nga divani dhe të shkojmë në palestër.
Në një botë ku këshillat për motivim gjenden me bollëk në TikTok, një studim i ri tregon se një nga mënyrat më efektive për të fituar dhe ruajtur motivimin është shumë më e thjeshtë: ndërgjegjësimi.
Studiuesit në Angli analizuan sjelljen e 109 të rriturve që nuk ishin shumë aktivë fizikisht. Për 30 ditë, ata u udhëzuan të synonin 8000 hapa në ditë, por vetëm gjysma ndoqi edhe një program të përditshëm përmes një aplikacioni. Ky program përfshinte praktika të shkurtra për të rritur ndërgjegjësimin ndaj trupit, lëvizjes dhe stërvitjes.
Mundesh me e lexu edhe…
Rezultatet ishin mbresëlënëse: grupi që praktikoi ndërgjegjësimin kishte bërë mesatarisht 373 minuta aktivitet fizik në javë, përkundrejt 297 minutave të grupit tjetër. Për më tepër, ata ndiheshin më të motivuar për të vazhduar rutinën e tyre.
Po pse funksionon ndërgjegjësimi kaq mirë?
Sipas autores kryesore të studimit, Dr. Masha Remskar, ndërgjegjësimi u jep njerëzve aftësi psikologjike që i ndihmojnë të krijojnë zakone të qëndrueshme. Shumë njerëz e gjejnë veten të motivuar për një periudhë të shkurtër, por ndërgjegjësimi ndihmon në zhvillimin e durimit dhe qëndrueshmërisë për t’ia dalë edhe kur nuk është e lehtë. Ajo gjithashtu rrit lidhjen mes mendjes dhe trupit, duke i bërë njerëzit më të pranishëm gjatë aktivitetit fizik.
Ushtrimet e ndërgjegjësimit nuk janë të ndërlikuara. Nëse jeni duke ecur apo ushtruar, provoni të përqendroheni në frymëmarrje, në ndjesitë që ndjeni në trup, apo në atë që ndodh përreth jush. Në vend që të shpërqendroheni me telefon apo muzikë, thjesht kushtojini vëmendje momentit dhe lëvizjes suaj.
Përveç kësaj, ekspertët sugjerojnë edhe disa mënyra të tjera për të qëndruar të motivuar: stërvituni me një mik, regjistrohuni në një kurs që ju pëlqen dhe përpiquni të lëvizni çdo ditë – edhe nëse janë vetëm 15 minuta.
Është më mirë të bëni pak, por rregullisht, sesa të mos bëni fare. Dhe mbi të gjitha, mos u tregoni shumë të ashpër me veten. Çdo lëvizje ka rëndësi dhe ndihmon në ndërtimin e një jete më të shëndetshme dhe të ekuilibruar. /Katror.info
Përgatiti:
