Më 4 qershor në Sallën “1 Tetori” në Prishtinë do të mbahet “Panairi Kombëtar i Punës dhe Karrierës 2025”, ngjarja më e madhe e punësimit në vend. Mbi 130 biznese dhe institucione do të marrin pjesë në këtë panair, duke ofruar më shumë se 500 vende të reja pune për punëkërkuesit në të gjithë Kosovën.
Ngjarja synon të krijojë një urë lidhëse direkte mes punëdhënësve dhe punëkërkuesve, duke shërbyer si një mundësi konkrete për ndërtimin e karrierës për të rinjtë, studentët dhe profesionistët nga të gjitha fushat. Pjesëmarrësit do të kenë mundësinë të prezantohen para kompanive, të ndjekin diskutime me ekspertë të tregut të punës, si dhe të përfitojnë nga këshillimi profesional dhe ndihma në përgatitjen e CV-së.
Për kompanitë dhe institucionet që duan të jenë pjesë e këtij eventi, pjesëmarrja është pa pagesë dhe regjistrimi mund të bëhet përmes faqes zyrtare: www.panairipunes.com.
Mundesh me e lexu edhe…
Panairi organizohet nga Agjencia e Punës e Republikës së Kosovës dhe Universiteti i Prishtinës “Hasan Prishtina”, në bashkëpunim me Odën Ekonomike Gjermano-Kosovare dhe me mbështetjen e Qeverisë Gjermane përmes GIZ (Deutsche Gesellschaft für Internationale Zusammenarbeit GmbH). Ngjarja përfaqëson një hap të rëndësishëm drejt zhvillimit të qëndrueshëm ekonomik dhe fuqizimit të tregut të punës në Kosovë./Katror.info
