I dërguari special i Bashkimit Evropian për dialogun ndërmjet Kosovës dhe Serbisë, Peter Sorensen, ka zhvilluar një sërë takimesh në Berlin me bashkëpunëtorët e kancelarit të ri gjerman, Friedrich Merz, në kuadër të përpjekjeve për të avancuar procesin e normalizimit të marrëdhënieve mes dy vendeve, shkruan Katror.info.
Sorensen u takua me Sekretarin e Shtetit, Géza von Geyr, si dhe me Këshilltarin Kryesor për Politikë të Jashtme të Kancelarit Merz, Günter Sautter. Ai e vlerësoi lart mikpritjen dhe gatishmërinë e autoriteteve gjermane për të mbështetur përpjekjet e BE-së në këtë drejtim.
“Gjithmonë është mirë të jesh në Berlin. Takime të para shumë të mira me Sekretarin e Shtetit, Géza von Geyr dhe Këshilltarin Kryesor për Politikë të Jashtme të Kancelarit Merz, Günter Sautter. Diskutuam se si të çojmë përpara normalizimin e marrëdhënieve midis Kosovës dhe Serbisë. Mirënjohës ndaj Gjermanisë për mbështetjen ndaj përpjekjeve të BE-së”, shkroi Sorensen në një postim në rrjetet sociale.
Mundesh me e lexu edhe…
Gjermania konsiderohet një ndër mbështetësit kyç të procesit të dialogut të lehtësuar nga BE-ja, dhe përfshirja aktive e kancelarit të ri Merz dhe ekipit të tij pritet të japë një shtysë të re për bisedimet që prej kohësh kanë hyrë në një fazë të ndërlikuar./Katror.info
