Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, do të vizitojë nesër Kosovën, në kuadër të një turneu zyrtar në Ballkanin Perëndimor, i cili nis sot. Lajmi është konfirmuar nga Shërbimi Diplomatik i BE-së.
Vizita në Kosovë është pjesë e itinerarit të dytë të saj në rajon, gjatë të cilit Kallas pritet të udhëtojë gjithashtu në Serbi dhe Maqedoninë e Veriut.
Sipas njoftimit zyrtar të BE-së, gjatë qëndrimit në Kosovë, Kallas do të zhvillojë takime me përfaqësues të partive politike dhe të organizatave të shoqërisë civile. Ajo pritet të mbajë një konferencë për shtyp më 22 maj, në ora 15:45, në Shtëpinë e Evropës në Prishtinë. Konferenca do të transmetohet drejtpërdrejt në platformën EBS.
Mundesh me e lexu edhe…
Në kuadër të vizitës, Përfaqësuesja e Lartë do të vizitojë edhe Misionin e BE-së për Sundimin e Ligjit në Kosovë (EULEX), si dhe do të takohet me komandantin e KFOR-it, gjeneralin Enriko Barduani.
Vizita e saj vjen në një moment kur autoritetet në Kosovë po bëjnë thirrje të përsëritura për heqjen e masave ndëshkuese nga ana e BE-së ndaj vendit, duke theksuar se kjo është e nevojshme për të vazhduar dialogun për normalizimin e marrëdhënieve me Serbinë./Katror.info
