Përfaqësuesja e Lartë e Bashkimit Evropian, Kaja Kallas, realizoi dje një vizitë zyrtare në Kosovë. Me të mbërritur në vend, ajo mbajti një konferencë të shkurtër për media, ku theksoi rëndësinë e themelimit të shpejtë të institucioneve të reja shtetërore.
“Formimi i Kuvendit të ri dhe Qeverisë së re është thelbësor për stabilitetin dhe rritjen e Kosovës, si dhe për të ardhmen evropiane të Kosovës”, deklaroi Kallas gjatë konferencës.
Në vijim të fjalës së saj, Kallas foli edhe për sanksionet e vendosura nga BE-ja, duke bërë të ditur se ato janë në proces të tërheqjes graduale. Ajo megjithatë theksoi rëndësinë që situata në veri të Kosovës të mos përshkallëzohet.
Mundesh me e lexu edhe…
Pas kësaj konference, Kallas zhvilloi takime me liderët e tri partive kryesore opozitare në vend. Fillimisht, ajo u takua me kryetarin e Partisë Demokratike të Kosovës, Memli Krasniqi, i cili përmes një postimi në Facebook, bëri të ditur detaje nga takimi:
“Diskutuam për zhvillimet politike në vend dhe për nevojën për stabilitet institucional dhe përparim të Kosovës drejt integrimit evropian. Znj. Kallas e njoftova se PDK ka dhënë dhe mbetet gjithmonë e gatshme të japë kontributin e saj në zgjidhjen e krizës aktuale politike, si dhe në mbrojtjen e interesit qytetar dhe shtetëror,” shkruan Krasniqi, duke shtuar se ai gjithashtu ka kërkuar angazhimin e Kallas për heqjen sa më të shpejtë të masave ndëshkuese ndaj Kosovës.
Më pas, Kallas u takua me Lumir Abdixhikun, kreun e Lidhjes Demokratike të Kosovës. Në postimin e tij, Abdixhiku ndau idetë që kishte prezantuar në takim:
“I shpreha qëndrimet e LDK-së mbi domosdoshmërinë e heqjes së masave ndaj Republikës së Kosovës. Këto masa më shumë se një Qeveri, dëmtojnë vet popullin e Kosovës. I shtrova dhe pikëpamjet tona mbi procesin e dialogut dhe të ardhmen që na pret. E njoftova mbi krizën aktuale politike në vend dhe propozimin e LDK-së për qeverinë gjithëpërfshirëse si ide e vetme funksionale sot. Rrugëtimi euroatlantik i Kosovës kërkon besim politik, kërkon guxim vendimmarrës, siç dhe kërkon një Bashkim Evropian që ofron vizion dhe të ardhme për popullin e Kosovës,” njoftoi Abdixhiku.
Kallas pati gjithashtu një takim edhe me kryetarin e Aleancës për Ardhmërinë e Kosovës, Ramush Haradinaj, i cili gjithashtu kërkoi heqjen e masave të BE-së ndaj Kosovës:
“Gjatë takimit, çmova lart rolin e saj dhe angazhimin e BE-së për sukseset e arritura në Kosovë dhe në rajon. Theksova nevojën urgjente për heqjen e sanksioneve ndaj Kosovës dhe njëkohësisht nënvizova rëndësinë e mbështetjes së vazhdueshme nga Bashkimi Evropian në rrugëtimin tonë dejt integrimit.”
Përfaqësuesja e Lartë Kallas pritet të ketë takime të tjera gjatë qëndrimit të saj në Kosovë, si pjesë e një turi diplomatik në rajonin e Ballkanit Perëndimor./Katror.info
