Shefja e diplomacisë evropiane, Kaja Kallas, po qëndron në Kosovë në kuadër të një vizite zyrtare, shkruan Katror.info.
Gjatë vizitës në Kosovë, Përfaqësuesja e Lartë e Bashkimit Evropian për Punë të Jashtme dhe Politikë të Sigurisë zhvilloi takime me liderët e partive opozitare si dhe me kryeministrin në detyrë, Albin Kurti. Kallas theksoi rëndësinë e dialogut dhe bashkëpunimit ndërmjet Kosovës dhe Bashkimit Evropian.
Vizita e saj në Kosovë vazhdoi sot në Mitrovicë, ku ajo u ndal tek misioni i EULEX-it. Kallas ndau momente nga ky takim përmes një postimi në Instagram, duke theksuar rolin e rëndësishëm që luan EULEX-i në fuqizimin e sundimit të ligjit në Kosovë dhe në mbështetjen e institucioneve vendore.
Mundesh me e lexu edhe…
Kallas nga veriu tha se ka versione të ndryshme të palëve në vizitën e saj të paparalajmëruar në veri të vendit ku u deklarua për mediat atje.
Sipas saj, vizita në veri është e rëndësishme sepse “shohim shumë narrativa të ndryshme dhe është e nevojshme të jemi dëshmitarë vetë se çfarë po ndodh në terren dhe çfarë po thonë njerëzit”.
“Mendoj se këto janë informacione jashtëzakonisht të rëndësishme për mua që ta kuptoj më mirë situatën, sepse shohim që njëra palë thotë një gjë dhe pala tjetër thotë diçka tjetër. Por mendoj se forcat ndërkombëtare që janë këtu po japin një pasqyrë mjaft të saktë dhe është gjithashtu e rëndësishme të flasim me njerëzit në vend”, tha Kallas, shkruan RTV21.
Ajo shtoi: “Dhe më pas mund të shohim se çfarë mund të bëjmë më shumë në mënyrë që e ardhmja të jetë e begatë, e sigurt dhe e qetë për të gjithë në Kosovë”.
Kryediplomatja e BE-së tha se në veri vizitoi gjykatën dhe tha se gjykata është funksionale dhe se është duke pritur që gjyqtarët serbë të kthehen.
“Gjithashtu u takova me përfaqësues të shkollave këtu për të kuptuar situatën dhe për të biseduar drejtpërdrejt me njerëzit, për të parë me sytë e mi se çfarë po ndodh. Ata, natyrisht, janë në lëvizje dhe unë kam folur me KFOR-in, gjithashtu edhe me misionin e EULEX-it, për të marrë përshtypjet e tyre për situatën në terren” tha Kallas./Katror.info
