Në kryeqytetin e Kosovës është mbajtur Forumi Ekonomik Kosovë–Nigeri, një ngjarje e rëndësishme që shënon një hap të ri në drejtim të forcimit të marrëdhënieve ekonomike ndërmjet dy vendeve. Forumi u organizua nga Oda Ekonomike e Kosovës (OEK) dhe mblodhi përfaqësues të lartë të komuniteteve të biznesit nga të dyja vendet, shkruan Katror.info.
Në njoftimin për medie të shpërndarë nga OEK thuhet se forumi krijoi një platformë të rëndësishme për takime B2B (biznes më biznes) ndërmjet ndërmarrjeve nga Kosova dhe Nigeria, me synimin për të identifikuar mundësitë e bashkëpunimit në fusha kyçe si tregtia, bujqësia, ndërtimtaria, teknologjia dhe energjia.
Gjatë forumit u nënshkrua edhe një memorandum bashkëpunimi në fushën ekonomike, duke dëshmuar angazhimin e të dyja palëve për të avancuar marrëdhëniet tregtare dhe investimet e ndërsjella, pavarësisht se Nigeria ende nuk e ka njohur zyrtarisht shtetin e Kosovës.
Mundesh me e lexu edhe…
Kryetari i OEK-ut, Lulzim Rafuna, e cilësoi këtë forum si një moment historik për zhvillimin e marrëdhënieve ndërmjet komuniteteve të biznesit të të dyja vendeve. Ai theksoi se Kosova ofron një fuqi punëtore të re dhe të talentuar, pozicion strategjik në Evropën Juglindore dhe një klimë të favorshme për sipërmarrje, duke e bërë vendin një destinacion tërheqës për investitorët nigerianë.
“Ky forum shënon një fillim të rëndësishëm për ndërtimin e urave të bashkëpunimit. Kosova mund të shërbejë si një pikë strategjike për prodhimin dhe eksportin drejt tregut evropian”, theksoi Rafuna.
Nga ana tjetër, drejtori i përgjithshëm i Dhomës së Tregtisë dhe Industrisë Bende në Nigeri, Ozemelam Nwosu, vlerësoi organizimin dhe theksoi se një treg i madh si ai nigerian ofron potencial të madh për produkte të ndryshme, veçanërisht ato që përmbushin standardet ndërkombëtare të sigurisë dhe cilësisë.
“Besojmë fuqishëm se këto partneritete do të sjellin përfitime të mëdha për të dyja dhomat dhe vendet tona në përgjithësi. Ky forum do të jetë një katalizator për zhvillim ekonomik të ndërsjellë dhe rritje të pranisë globale të bizneseve tona,” deklaroi Nwosu.
Pjesëmarrësit në forum shprehën optimizëm se kjo nismë do të shndërrohet në një rrugë të qëndrueshme bashkëpunimi, që do të sjellë përfitime të prekshme për ekonomitë e të dyja vendeve në vitet në vijim./Katror.info.
