Vetëm tetë ditë para se të hyjë në fuqi liberalizimi i tregut të energjisë për bizneset, përfaqësues të komunitetit të biznesit shprehen të shqetësuar për mungesën e alternativave reale në zgjedhjen e operatorëve furnizues me energji elektrike. Edhe pse në Kosovë janë të licencuar 19 operatorë, bizneset raportojnë se deri më tani kanë marrë ofertë vetëm nga KESCO – dhe atë me çmime që pretendohet të jenë deri në 300% më të larta se ato aktuale.
Përfaqësues të bizneseve thonë se kalimi në tregun e lirë energjetik, që nis më 1 qershor, po i gjen të papërgatitura dhe të ekspozuara ndaj çmimeve të larta pa ndonjë konkurrencë reale. Ata shprehen të shqetësuar se ofertat e vetme nga KESCO mund të dëmtojnë rëndë sektorin privat dhe, në mënyrë zinxhirore, të ndikojnë në rritjen e çmimeve për konsumatorët fundorë.
Zëdhënësja e KESCO-s, Margarita Rashiti, tha se kompania është e angazhuar për të bashkëpunuar me të gjitha bizneset që do të kalojnë në treg të hapur, por nuk dha detaje konkrete mbi çmimet e ofertave të dhëna. “Si furnizues i derregulluar, KESCO është e përkushtuar të zhvillojë takime me bizneset që janë të interesuara për ofertat tona. Në treg të hapur, bizneset do të tarifohen me çmime të tregut,” tha ajo.
Mundesh me e lexu edhe…
Ndërkohë, operatorë të tjerë si INFINIT ENERGY DOOEL – Dega në Kosovë, kanë bërë të ditur se janë në fazat përfundimtare të përgatitjeve dhe së shpejti do të dalin me ofertat e tyre. Sipas deklaratës së kësaj kompanie, çmimet do të varen nga analiza e shpenzimeve të energjisë për secilin klient dhe nga luhatjet në treg. Kompania thekson se është udhëzuar nga Zyra e Rregullatorit për Energji (ZRRE) që të punojë me marzhë të ulët fitimi, sidomos në fazën fillestare të liberalizimit.
ZRRE ndërkohë ka bërë të ditur për RTK se operatorët e tjerë do të jenë gati për të ofruar furnizim sapo bizneset të dërgojnë nominimet e tyre.
Për të ndihmuar në këtë proces, ministrja në detyrë e Ekonomisë, Artane Rizvanolli, ka zhvilluar një takim me përfaqësues të ZRRE-së dhe furnizues të licencuar, duke i inkurajuar ata që të ofrojnë sa më shumë informacione dhe të sqarojnë kostot për bizneset që do të hyjnë në tregun e lirë.
Liberalizimi i tregut të energjisë, i cili pritej të sillte më shumë konkurrencë dhe përfitime për konsumatorët, aktualisht është shoqëruar me pasiguri, mungesë ofertash dhe frikë nga çmime të papërballueshme – duke ngritur nevojën urgjente për një ndërhyrje më aktive të autoriteteve për të siguruar një proces të drejtë dhe të barabartë për të gjitha palët e interesit./Katror.info
