Presidenti amerikan, Donald Trump, ka rinisur “sulmet” ndaj Apple, duke i kërkuar kompanisë që të prodhojë iPhone në Shtetet e Bashkuara – përndryshe do të përballet me tarifa të paktën 25% për çdo pajisje të prodhuar jashtë vendit.
Kjo nuk është hera e parë që Trump tenton të rikthejë prodhimin e iPhone në SHBA. Që nga fushata e tij e parë presidenciale në vitin 2016, ai premtoi se do ta “detyronte Apple-in të prodhonte këtu kompjuterët dhe pajisjet e tyre të mallkuara, në vend se jashtë vendit”.
Por, edhe pas një dekade, asnjë iPhone nuk prodhohet në Amerikë, dhe afro 80% e tyre vazhdojnë të montohen në Kinë, shkruan The New York Times, përcjell Katror.info.
Mundesh me e lexu edhe…
A mundet Apple të prodhojë iPhone në SHBA?
Sipas ekspertëve, teknologjikisht po, por ekonomikisht jo. Analisti i TechInsights, Wayne Lam, thekson se një iPhone i prodhuar në SHBA do të kushtonte mbi 2,000 dollarë.
Kompania do të detyrohej të investojë në makineri të reja, të mbështetet më shumë në automatizim dhe të përballojë mungesën e fuqisë punëtore të kualifikuar.
“Është absurde,” – tha Lam. “Në afat të shkurtër, nuk është ekonomikisht e realizueshme.”
Eksperiencat e mëhershme
Apple ka provuar më parë të prodhojë në SHBA. Në vitin 2013, filloi montimin e kompjuterëve Mac në Teksas. Por procesi dështoi për shkak të mungesës së pjesëve dhe fuqisë punëtore – madje kompania nuk gjeti dot as një furnizues vendas për vidhat e vogla të nevojshme.
Edhe pse në vitin 2019 Tim Cook i tregoi personalisht Trump-it fabrikën në Austin, etiketat e fundit të Mac Pro thonë qartë se ato pajisje tani janë “produkt i Tajlandës”.
Pse është kaq e vështirë zhvendosja e prodhimit?
Kina ofron avantazhe që SHBA nuk mund t’i ofrojë: një fuqi punëtore sezonale, miliona inxhinierë dhe punëtorë më të përshtatshme për punët precize si montimi i pjesëve të vogla të iPhone-it.
Sipas analizave të brendshme të Apple, SHBA nuk ka kapacitetin e nevojshëm njerëzor dhe logjistik për të përballuar prodhimin kompleks të një pajisjeje si iPhone.
“Këto janë fabrika të sofistikuara me mijëra inxhinierë. Nuk mund t’i ngritësh brenda natës në SHBA,” – theksoi Matthew Moore, ish-menaxher në Apple.
A po e zëvendëson India Kinën?
Apple ka rritur ndjeshëm prodhimin në Indi, jo vetëm për t’iu shmangur taksave të larta për importim, por edhe për të fituar pjesë më të madhe të tregut në vendin e dytë më të madh për telefonë të mençur.
Megjithatë, varësia ndaj Kinës mbetet. Pjesët më të ndërlikuara – ekranet, kamerat dhe moduli për Face ID – montohen ende në Kinë dhe më pas dërgohen në Indi për montim final. Rezultati: një iPhone që etiketohet si “Assembled in India”, por që në të vërtetë është “Made in China” në shumicën e komponentëve./Katror.info
