Temperaturat e larta dhe ditët me diell kanë shtuar ndjeshëm numrin e qytetarëve nga Kosova që po udhëtojnë drejt bregdetit të Shqipërisë për të kaluar pushimet verore. Kjo lëvizje masive është kthyer tashmë në një traditë që nga fillimi i viteve 2000, kur shqiptarët e Kosovës nisën të frekuentonin në mënyrë të rregullt bregdetin shqiptar gjatë sezonit të verës, shkruan Katror.info.
Pika kufitare në Morinë po përballet me një fluks të shtuar udhëtarësh. Për të përballuar këtë situatë dhe për të shmangur pritjet e gjata, të gjitha sportelet janë vënë në funksion të plotë. Autoritetet kanë rritur kapacitetet operacionale në këtë pikë kufitare, duke garantuar një kalim sa më të shpejtë dhe të organizuar për qytetarët.
Sipas të dhënave zyrtare, vetëm gjatë 24 orëve të fundit, në pikën kufitare të Morinit kanë hyrë dhe dalë mbi 15 mijë persona. Ky numër pritet të rritet edhe më shumë gjatë fundjavës, veçanërisht të shtunën dhe të dielën, kur fluksi tradicionalisht është më i lartë.
Mundesh me e lexu edhe…
Autoritetet vijojnë të apelojnë për durim dhe respektim të rregullave kufitare, ndërsa vlerësojnë bashkëpunimin mes Kosovës dhe Shqipërisë si thelbësor për menaxhimin efikas të sezonit turistik./Katror.info
