Vala e të nxehtit afrikan do të vazhdojë të ndikojë vendin tonë edhe për dy ditët e para të javës që vjen, duke sjellë temperatura të larta dhe mot përvëlues.
Megjithatë, një ndryshim i ndjeshëm pritet të ndodhë nga dita e mërkurë, kur një front i freskët atmosferik do të kalojë mbi rajonin tonë, duke shkaktuar ulje të ndjeshme të temperaturave dhe reshje të mundshme, shkruan Katror.info.
Sipas Institutit Hidrometeorologjik, ndikimi i masave të ftohta ajrore nga verilindja dhe veriperëndimi do të sjellë kushte më të freskëta atmosferike, reshje shiu dhe ndonjëherë edhe stuhi të shoqëruara me shkarkime rrufesh. Pritet që kjo situatë të zgjasë deri në fundjavë, duke stabilizuar gradualisht kushtet meteorologjike.
Mundesh me e lexu edhe…
E Hënë, 7 Korrik 2025
Moti do të jetë me diell dhe vranësira të pakta. Temperaturat minimale do të lëvizin ndërmjet 12-18°C, ndërsa ato maksimale do të arrijnë deri në 37°C. Erërat do të fryjnë nga verilindja me shpejtësi 1-5 m/s. Indeksi UV do të jetë shumë i lartë.
E Martë, 8 Korrik 2025
Moti do të vijojë të jetë me diell dhe vranësira të shpërndara, me mundësi për reshje të izoluara shiu në disa zona. Temperaturat do të qëndrojnë të larta, me vlera minimale 12-18°C dhe maksimale deri në 37°C. Era do të jetë më aktive, deri në 9 m/s nga verilindja.
E Mërkurë, 9 Korrik 2025
Kjo ditë sjell ndryshimin e pritur. Vranësirat do të intensifikohen dhe do të krijojnë kushte për reshje të dendura shiu, breshër dhe rrufe. Temperaturat do të bien ndjeshëm – me minimale nga 11°C dhe maksimale deri në 24°C. Priten stuhi lokale dhe erëra të forta.
E Enjte, 10 Korrik 2025
Moti do të jetë pjesërisht me diell dhe i vranët. Temperaturat do të sillen nga 9-13°C në mëngjes dhe do të arrijnë deri në 23°C në mesditë. Erërat do të jenë të lehta deri mesatare nga verilindja.
E Premte, 11 Korrik 2025
Kushtet meteorologjike do të stabilizohen. Moti do të jetë kryesisht me diell, me vranësira të lehta në zonat malore. Temperaturat minimale do të bien në 9-12°C, ndërsa maksimalet do të rikthehen lehtë në 22-26°C. Era do të fryjë nga veriperëndimi me intensitet të ulët.
Këshilla për qytetarët:
Duke pasur parasysh indeksin e lartë UV në fillim të javës, qytetarëve u rekomandohet të shmangin ekspozimin direkt në diell gjatë orëve të pikut dhe të marrin masa mbrojtëse si përdorimi i kremrave mbrojtës dhe veshjeve të lehta. Gjatë pjesës së dytë të javës, rekomandohet kujdes nga reshjet intensive dhe stuhitë e mundshme./Katror.info
