Presidenti Donald Trump i ka quajtur “qesharake” planet e Elon Muskut për formimin e një partie të re politike, duke hedhur kritika të reja ndaj miliarderit të teknologjisë dhe duke thënë se aleati i Muskut që dikur e emëroi për të drejtuar NASA-n do të kishte paraqitur konflikt interesi duke pasur parasysh interesat e biznesit të Muskut në hapësirë, raporton Reuters.
Një ditë pasi Musk përshkallëzoi raportin e tij me Trumpin dhe njoftoi formimin e një partie të re politike amerikane, presidenti republikan u pyet për këtë para se të hipte në “Air Force One” në Morristown, New Jersey, ndërsa po kthehej në Uashington pas vizitës në klubin e tij të golfit.
“Mendoj se është qesharake të krijosh një parti të tretë. Ne kemi një sukses të jashtëzakonshëm me Partinë Republikane. Demokratët kanë humbur rrugën e tyre, por gjithmonë ka qenë një sistem dypartiak, dhe mendoj se krijimi i një partie të tretë vetëm sa shton konfuzionin”, u ka deklaruar Trump gazetarëve.
Mundesh me e lexu edhe…
“Me të vërtetë duket se sistemi është zhvilluar për dy parti. Partitë e treta nuk kanë funksionuar kurrë, kështu që ai mund të argëtohet me të, por unë mendoj se është qesharake”, ka shtuar Trump.
Menjëherë pasi foli për Muskun, Trump postoi komente të mëtejshme në platformën e tij Truth Social, duke thënë: “Jam i trishtuar që e shoh Elon Muskun të dalë plotësisht ‘nga shinat’, duke u bërë në thelb një TREN I RRËMUAR gjatë pesë javëve të fundit”.
Musk ka njoftuar të shtunën se po krijon “Partinë Amerikane” si kundërpërgjigje ndaj projektligjit të Trumpit për uljen e taksave dhe shpenzimeve, për të cilin tha se do ta falimentonte vendin.
“Çfarë qëllimi kishte @DOGE (Departamentin e Qeverisjes Efektive) nëse ai do ta rriste borxhin me 5 trilionë dollarë??” – ka shkruar Musk në X të dielën, duke iu referuar agjencisë së zvogëlimit të qeverisë që e drejtoi për një kohë të shkurtër. Kritikët kanë thënë se projektligji do të dëmtojë ekonominë e SHBA-së duke shtuar ndjeshëm deficitin e buxhetit federal.
Musk ka deklaruar se partia e tij e re do të përpiqet në zgjedhjet e mesit të mandatit të vitit të ardhshëm të rrëzojë ligjvënësit republikanë në Kongres, të cilët mbështetën masën gjithëpërfshirëse të njohur si “projektligji i madh dhe i bukur”.
Musk shpenzoi miliona dollarë duke mbështetur përpjekjet e Trumpit për rizgjedhje në vitin 2024 dhe, për një kohë, shfaqej rregullisht në krah të presidentit në Zyrën Ovale të Shtëpisë së Bardhë dhe gjetiu. Mosmarrëveshja e tyre mbi projektligjin e shpenzimeve çoi në një grindje që Musk u përpoq shkurtimisht ta zgjidhte, por pa sukses./Kallxo.com/Katror.info
