Prishtina po rikthen në jetë “Kurrizin”, një nga hapësirat më ikonike dhe të dashura për kulturën alternative të qytetit, shkruan Katror.info.
Sipas Drejtores për Kulturë në Prishtinë, Sibel Halimi, “Kurrizi” nuk ka qenë kurrë vetëm një rrugëkalim.
““Kurrizi” nuk ka qenë kurrë vetëm një shtegkalim. Ka qenë zemra alternative e qytetit, një udhëkryq idesh, ku muzika rock, kafenetë, ndejat spontane, ekspozitat e artit modern dhe lëvizjet e reja kulturore kanë gdhendur një frymë të lirë qytetare”, shkroi Drejtorja për Kulturë në Prishtinë, Sibel Halimi.
Mundesh me e lexu edhe…
Me rinovimin e plotë, “Kurrizi” po kthehet në një vend ku takohen arti, kultura dhe kujtesa kolektive, duke lidhur të kaluarën me të tashmen në një mënyrë unike.
Në qendër të rilindjes artistike është ekspozita e fotografive që dokumenton historinë e njerëzve dhe grupeve të famshme që bënë “Kurrizin” një oazë të artit alternativ. Emra si Grupi Minatori, DJ James dhe performuesja Oda Haliti janë pjesë e këtij rifreskimi kulturor, duke sjellë muzikën rock, elektronike dhe artin bashkëkohor në një narrativë të vetme.
Sipas Halimit, “Kurrizi” është më shumë se një hapësirë, është një simbol i lirisë dhe kulturës qytetare që nuk duhet harruar.
Me këtë projekt, “Kurrizi” synon të rikthehet si vendtakim kryesor i artistëve dhe adhuruesve të artit, duke i hapur dyert për brezat e rinj të Prishtinës dhe duke mbajtur gjallë frymën e një qyteti që nuk ndalon së krijuari.
Në një kohë kur hapësirat kulturore alternative po bëhen gjithnjë më të rralla, “Kurrizi” premton të jetë pikë referimi dhe frymëzim për komunitetin artistik dhe kulturor të kryeqytetit./Katror.info
