Që nga e hëna edhe Komuna e Suharekës është përballur me disa vatra zjarri, të cilat kanë përfshirë disa zona të kësaj komune, por fatmirësisht tashmë janë nën kontroll. Autoritetet konfirmojnë se nuk ka rrezik për banorët apo pronat, ndërsa ekipet e zjarrfikësve vazhdojnë të qëndrojnë në terren për ta monitoruar situatën dhe parandaluar ndonjë rindezje të mundshme të flakëve.
Pas disa orësh përpjekjesh intensive, zjarret që shpërthyen në disa zona të komunës janë vënë nën kontroll. Ekipet e zjarrfikësve kanë arritur të lokalizojnë vatrat dhe të parandalojnë përhapjen e mëtejshme të flakëve.
“Siç po e shihni, këtu jemi në fshatin Savrovë. Ka ndoshta disa hektarë të djegura në hamullore. Për momentin, situata është nën kontroll. Jemi këtu bashkë me zjarrfikësit dhe njësitet e Policisë së Kosovës për të parë se si ka ardhur deri te kjo situatë. Jemi këtu bashkë me qytetarët, po mundohemi ta mbajmë situatën nën kontroll”, tha për RTK, Brahim Thaçi, shefi i kabinetit të kryetarit të komunës.
Mundesh me e lexu edhe…
Njësiti i zjarrfikësve ka konfirmuar se nuk ka rrezik për banorët, edhe pse disa prona kanë qenë në rrezik.
“Të hënën kemi pasur 5 vatra zjarri, kurse të martën 2 të tjera. Njëra prej tyre ka qenë në një fushë gruri, e cila është djegur. Janë rrezikuar edhe kombajnat që ishin duke korrur, por për momentin e kemi fikur zjarrin. Kemi pasur gjithashtu edhe një vatër në hyrje të autostradës, pra në hyrje të Suharekës, por e kemi lokalizuar”, tha Halit Bytyqi, zëvendëskomandant i njësisë së zjarrfikësve në Suharekë.
Autoritetet lokale në Suharekë u bëjnë thirrje qytetarëve që të mos ndezin zjarre në natyrë, sidomos në hapësirat pas korrjes së grurit, pasi rreziku për shpërthim zjarresh mbetet i lartë gjatë këtyre ditëve të nxehta./Katror.info
