Nola Fejza, teniserja junior më premtuese nga Kosova, po vazhdon të shkëlqejë në arenën ndërkombëtare të tenisit, duke qenë për të dytin vit radhazi e vetmja përfaqësuese e Kosovës në turneun prestigjioz ndërkombëtar të tenisit në Dubrovnik.
E lindur më 28 prill 2013, Nola është vetëm 12 vjeç dhe tashmë renditet ndër dy teniseret më të mira në Kosovë në kategoritë U12/U13. Që në moshë shumë të vogël, ajo ka treguar një përkushtim të jashtëzakonshëm dhe pasion të madh për tenis, duke u shquar në gara vendore dhe ndërkombëtare, raporton Katror.info..
Në vitin 2024, Nola përfaqësoi Kosovën me krenari në Dub Bowl, një nga turnetë më prestigjioze për talentet e rinj evropianë në kategorinë U11. Ky vit i ri, ajo po konkurron në kategorinë U13 në të njëjtin event, duke demonstruar zhvillim dhe përkushtim të vazhdueshëm në nivel elitë.
Mundesh me e lexu edhe…
Si lojtare, Nola spikat për konsistencën në goditje, strategjinë e avancuar në fushë dhe disiplinën e fortë në stërvitje. Aftësia e saj për të lëvizur kundërshtaren dhe për të menaxhuar taktikisht lojën e bën atë një konkurrente serioze në çdo sfidë, si në ndeshjet individuale ashtu edhe në ato në dyshe.
Në të ardhmen e afërt, Nola synon të marrë pjesë në turnetë ITF për moshat U14 dhe të ngjitet në ranglistat më të larta rajonale dhe ndërkombëtare. Ajo gjithashtu po punon për të forcuar përvojën e saj në gara me nivel më të lartë dhe për të bashkëpunuar me trajnerë dhe akademi elitare evropiane.
Për të dytin vit me rradhë, Nola Fejza është zëri dhe fytyra e tenisit kosovar në arenën ndërkombëtare – një shembull frymëzimi dhe dëshmie se sporti i Kosovës po rritet me shpejtësi dhe po prodhon talente që sfidojnë kufijtë./Katror.info
