Kosovare Asllani shkëlqeu të martën mbrëma, derisa si kapitene e udhëhoqi Suedinë drejt fazës nokaut në Evropianin e futbollisteve. Në Luzern të Zvicrës, në praninë e 14 mijë shikuesve, Zvicra fitoi 3:0 ndaj Polonisë për të avancuar në çerekfinale. Asllani 35-vjeçare, asistoi në golin e parë dhe shënoi në të dytin.
Për të ishte paraqitja e 201-të me Suedinë dhe goli i 49-të. Ajo ka vendosur disa rekorde në paraqitjen impresive ndaj polakeve.
Është bërë lojtarja e parë e Suedisë që ka shënuar në katër kampionate të ndryshme evropiane. Kishte shënuar edhe në Euro 2009, Euro 2013 dhe Euro 2022.
Mundesh me e lexu edhe…
Me 35 vjet e 344 ditë, Asllani është lojtarja më e vjetër që ka shënuar gol për Suedinë në ndonjë Evropian.
Po ashtu është lojtarja e parë e Suedisë që ka bërë 20 paraqitje në Kampionate Evropiane.
“Është e veçantë, por aktualisht po mendoj vetëm për fitoren. Tani duhet të pushojmë, të rikuperohemi dhe të fokusohemi në ndeshjen e së shtunës. Por gjithnjë është e veçantë të shkruash histori”, ka thënë Asllani për sajtin zyrtar të UEFA-s.
Të shtunën në Zurich, Suedia luan ndaj Gjermanisë për vendin e parë në grup. Edhe Gjermania ka fituar dy ndeshjet e para dhe është kualifikuar në çerekfinale. Suedisë i mjafton barazimi për ta fituar grupin.
Ndaj Polonisë, të tre golat e Suedisë u shënuan me goditje me kokë.
“Nuk ndodh shpesh të shënoi me goditje me kokë. Ishte gol i bukur. Një fitore e mirë dhe angazhim i mirë ekipore. Tani mund të jemi plotësisht të fokusuara te ndeshja me Gjermaninë dhe që ta fitojmë grupin”, ka shtuar Asllani.
Ajo i është bashkuar një grupi shumë të vogël të lojtareve me mbi 200 ndeshje me përfaqësuese.
Në minutën e 30-të të ndeshjes ndaj Polonisë, Asllani u ndëshkua me karton të verdhë. Bëhet fjalë për një duel me lojtaren e Polonisë, Ewa Pajor.
“Plotësisht e pakuptueshme. Unë u tërhoqa e para dhe është dashur të ketë faul ndaj meje. Nuk kuptoj asgjë. Isha shumë e nervozuar”, ka thënë futbollistja me prejardhje nga Mitrovica./KOHA/Katror.info
