Në kulmin e vapës dhe thatësisë, Liqeni i Badovcit – një nga burimet kryesore të ujit për Prishtinën – po përballet me rënie të ndjeshme të nivelit të ujit. Megjithatë, kompania rajonale e ujësjellësit “Prishtina” siguron se furnizimi për konsumatorët po vazhdon pa reduktime, ndërsa apelon për përdorim racional dhe ndalimin e keqpërdorimeve, shkruan KOHA.
Në një periudhë me temperatura ekstreme dhe mungesë të reshjeve, niveli i ujit në liqenin e Badovcit, një nga burimet kryesore të furnizimit me ujë për kryeqytetin dhe rrethinën, ka rënë ndjeshëm.
Aktualisht, ai ndodhet -4.5 metra nën nivelin maksimal.
Mundesh me e lexu edhe…
Kjo rënie përkon me rritjen e kërkesës për ujë të pijshëm, duke ngritur shqetësime për furnizimin e qëndrueshëm.
Arjeta Mjeku, zëdhënëse e kompanisë rajonale të ujësjellësit “Prishtina”, thotë se pavarësisht kësaj situate, shpërndarja e ujit vazhdon të bëhet në mënyrë të barabartë për të gjithë konsumatorët.
“Nëse krahasojmë me vitin 2013 dhe 2014, ku nivelet e ujit ishin minus 14 metra nën nivel maksimal, tani Badocin e kemi minus 4 metra e gjysmë nën nivelin maksimal ndërkaq Batllavën 3.3 metra nën kuotën maksimale. Nëse e krahasojmë me vitin 2023 Badoci në këtë kohë ka qenë duke u kapërderdhur por me një shpenzim racional të ujit të pijshëm edhe furnizimi do të bëhet si shpërndarje e barabartë për të gjithë konsumatorët”, ka deklaruar Mjeku.
Mjeku shton se aktualisht nuk janë duke u zbatuar reduktime të planifikuara dhe se të gjitha impiantet, Albaniku, Shkabaj dhe Badovci, janë në funksion të plotë.
“Për momentin jemi duke punuar me kapacitete maksimale në të tria impiantet në Albanik, Shkabaj dhe Badoc mirëpo mungesë të ujit ka vetëm në disa pika të larta të ujit. Nga ne nuk ka reduktime por në rast se shohim se ka mungesë të ujit në pikat e larta ne do të bëjmë reduktime të ujit. Tani për tani shpërndarja është duke u bërë në mënyrë të barabartë te secili konsumatorë”, ka shtuar ajo.
Sipas saj, një nga faktorët që vështirëson furnizimin e rregullt me ujë është keqpërdorimi nga vetë konsumatorët.
“Ka keqpërdorime të formave të ndryshme, lidhjet ilegale në rrjetin e ujësjellësit tonë. Ka ujitje të bahçes, oborrit e të tjera, por forma më e keqe e përdorimit janë kyçje ilegale gjë që pamundëson edhe shërbimin e rregullt te qytetarët. Nuk e di pse bëhet kjo kyçje ilegale, ndoshta është një formë më e lehtë për ta që të vidhet uji dhe jo është një formë e papranueshme sepse kjo mund të dënohet deri në 3 vite burgim”, ka thënë Mjeku.
Edhe pse disa banorë në Prishtinë janë ankuar për mungesë uji, Mjeku thekson se nuk ka asnjë reduktim të aplikuar dhe inkurajon qytetarët të raportojnë çdo problem.
“Ne nuk jemi duke aplikuar asnjë reduktim. Ne i njoftojmë qytetarët kur ka punime. Ata mund të vijnë tek ekipet tona ta lajmërojnë rastin dhe ne do ta trajtojmë atë. Ne jemi duke realizuar shkyçje për borxhet e mëdha sidomos në bizneset, mbi 5 milionë nga bizneset ndërsa në amvisëri është mbi 40 milionë euro”, ka shtuar tutje ajo.
Ndërkohë që kërkesa për ujë mbetet e lartë, priten ndryshime të shpejta të motit.
Sipas “Meteo Kosova” nuk dihet ende nëse temperaturat ekstreme do të vazhdojnë edhe gjatë gushtit.
“Deri të dielën pritet rreth 30 gradë celsius dhe fillimi i javës së ardhshme mund të jetë me temperatura më të larta, ndërsa pjesa e dytë e javës së ardhshme mund të jetë me reshje dhe temperatura më afër normales. Edhe pjesa tjetër e korrikut nuk mund të dihet, po ashtu edhe gushti. Normalisht pasi ka nisur vera me temperatura ekstreme, pjesa tjetër e verës duhet të jetë me temperatura më afër normales dhe me më shumë reshje. Kështu të paktën kanë qenë edhe parashikimet për në pranverën e vonshme. Por që nuk mund të themi me siguri”, thuhet në njoftimin e Meteo Kosova.
Nga e mërkura pritet depërtimi i një fronti të ftohtë, që do të sjellë reshje, vranësira dhe ulje të ndjeshme të temperaturave – deri në 20°C. Edhe dita e enjte do të jetë nën ndikimin e këtyre masave, me mot të paqëndrueshëm, ndërsa nga e premtja pritet një përmirësim i lehtë./KOHA/Katror.info
