Një festival kombëtar, fituesi i të cilit do ta përfaqësonte Kosovën në “Eurosong”, kishte qenë ndër idetë kryesore kur është themeluar Festivali i Këngës në RTK. Por, kjo nuk ka ndodhur asnjëherë. Dhe duket se vazhdon të jetë e njëjta situatë. Me rëndësi që festivali po krijon një traditë e në njëfarë mënyre po e vazhdon atë të vjetrën që pati frymuar me “Akordet e Kosovës”. Pas dy edicioneve “të suksesshme”, me sallën e djegur që qe shndërruar në skenë gjigante për t’u lënë vend artistëve që sjellin artin e tyre përmes këngës, këtë tetor do të vijë edicioni i tretë i këtij festivali, e përgatitjet për organizimin e tij tashmë kanë filluar.
Drejtor artistik i edicionit të tretë të festivalit do të jetë Florent Boshnjaku, i njëjti që e ka udhëhequr artistikisht deri tash këtë ngjarje. Ai ka treguar se vendi ku mbahet është e improvizimeve, por tani me probleme pak më lehtësisht të zgjidhshme. Edhe sivjet do të përdoret salla e djegur e Pallatit të Rinisë, e cila si feniks ngrihet prej hiri në ditët e festivalit dhe, me të bitisur festa, shuhet sërish, për t’u shndërruar në gjendjen e mëparshme: në parking, ashtu siç ka ngjarë viteve të kaluara. Muaj përpara se të ndodhë ngjarja me të cilën synohet promovimi i vlerave të këngës shqipe, është shpallur konkursi për pranimin e këngëve konkurruese, për të qenë i hapur deri në fund të gushtit.
“Salla do të jetë e njëjtë, ajo veç është bërë publike qysh prej marrëveshjes që është bërë me Komunën e Prishtinës, do të jetë e njëjta sallë, normalisht që skena duhet të përgatitet prapë për këtë edicion, do të jetë tri net festivali, njëjtë siç ka qenë edhe në dy edicionet e kaluara, me të njëjtin format të mbrëmjeve, domethënë do të jenë dy net, t’i quajmë gjysmëfinale dhe nata finale”, ka thënë drejtori artistik Boshnjaku për KOHËN.
Mundesh me e lexu edhe…
Për organizim ishte paraparë që nga Ministria e Kulturës të jepen 200 mijë euro. Para dy vjetësh, nëpërmjet një memorandumi të bashkëpunimit Ministria e Kulturës kishte zotuar për RTK-në 750 mijë euro për tre vjet. Për edicionin e parë janë dhënë 300 mijë euro, për të dytin ishin paraparë 250 mijë e për atë të këtij viti 200 mijë. Por, nuk ngjau kështu. U nënshkrua një aneks memorandumi, një marrëveshje për të mos e lënë në baltë Radiotelevizionin kombëtar dhe u dhanë sërish 300 mijë euro.
“Buxheti i festivalit edhe këtë vit është 350 mijë, nga të cilat 300 mijë edhe këtë vit do t’i japë Ministria dhe 50 mijë do t’i japë Radiotelevizioni i Kosovës. Vitin që vjen unë nuk jam në gjendje të them çfarë do të ndodhë, por në planifikimin që Drejtoria e Përgjithshme dhe financat e RTK-së kanë bërë këtë vit, edhe për vitin që vjen është vendosur shifra 350 mijë”, pati thënë tetorin e kaluar drejtori i atëhershëm i Festivalit, Adrian Krasta, në konferencën ku hapësira për pyetje u ishte dhënë vetëm gazetarëve të RTK-së dhe atyre të Radio-Kosovës. Krasta kishte qenë edhe zëvendësdrejtor i RTK-së në atë kohë dhe kishte dhënë dorëheqje fill pas përfundimit të edicionit të dytë.
Edhe sivjet festivali është larg garës evropiane të këngës “Eurosong” e, sipas Boshnjakut, anëtarësimi në EBU nuk varet nga festivali dhe për këtë hap duhet të lobojnë të gjitha institucionet e Kosovës.
“Për anëtarësim në EBU vjet është dërguar letra, prapë është në bisedë, me shpresë që do të ndodhë diçka, por e dimë se kryekëput varet prej pozicionit politik të Kosovës dhe nevojitet lobim shumë më i madh i krejt institucioneve, jo veç i Radiotelevizionit të Kosovës, që të ketë mundësi të ndodhë ajo, me shpresë që do të ndodhë, por gjithsesi, e bukura e kësaj pune është që festivali ka filluar dhe po krijohet një traditë, punë që komplet ekipi i Radiotelevizionit të Kosovës dhe krejt njerëzit përreth të fillojnë të jenë të gatshëm kur ai moment të vijë, teknikisht në aspektin e përgatitjeve dhe çdo send në festival”, ka thënë ai.
Ka bërë të ditur se edhe sivjet do të jetë pothuajse e njëjta trupë muzikore për tri netët e festivalit, që zakonisht ngjan të jenë ditët e fundit të tetorit.
“Ekipet muzikore, muzikantët dhe bendi, sidomos bendi kryesor, do të jenë të njëjtit, për pjesën tjetër ende jam në diskutime të përgatitjeve të pjesës tjetër të orkestrës dhe normalisht njerëzve e dirigjentëve që do ta udhëheqin orkestrën për ato tri net”, ka shtuar Boshnjaku, duke thënë se ndonëse është herët të shpalosen materialet e festivalit, kriteret e përzgjedhjes do të jenë sikur në edicionet e kaluara, për të sjellë në këtë “ngjarje të jashtëzakonshme” artin e tyre.
“Kriteret do të jenë siç i kemi pasur edhe vitet e kaluara, tash është ende herët të flasim se çfarë materialesh ka brenda festivalit. Le të shpresojmë që anëtarët dhe autorët, të gjithë, jo vetëm në Kosovë, do të bien prurje të cilat ia vlen për të qenë pjesë në këtë festival, sepse është një ngjarje e jashtëzakonshme, është një mundësi e jashtëzakonshme që të dalin në atë skenë me krejt atë orkestër, me krejt atë përgatitje, me krejt atë skenografi, thjesht për të dalë me një këngë të cilën ata e prezantojnë”, ka thënë Boshnjaku tutje.
Ka bërë thirrje që artistët të mos hezitojnë dhe ta marrin hapin për ta shfrytëzuar hapësirën që ofron festivali.
“E bëj edhe një thirrje publike që njerëzit të mos hezitojnë ta shfrytëzojnë një infrastrukturë e cila u ofrohet, e cila është me të vërtetë e jashtëzakonshme dhe ajo është dëshmuar në dy edicionet e kaluara, kështu që shpresoj se edhe në këtë edicion të krijohet ajo tradita e pjesëmarrjes në Festivalin e Këngës”, ka shtuar ai.
Vitin e kaluar, pas tri netësh festë, çmimin kryesor të festivalit, trofeun e ashtuquajtur “Diamanti blu”, e kishte marrë kënga “Flas me gjethen” nga Endrit Krasniqi, e edicionin debutues e kishte fituar Arbër Salihu, i njohur si “La Fazani”, me këngën “Oj Kosovë”. Këto këngë, të ndryshme kah zhanret dhe trajtimi i temave, kanë një të përbashkët: asnjëra nuk ka arritur të dalë jashtë vendit ku është kënduar, e fatkeqësisht ky fat druhet ta përcjellë edhe edicionin e tretë të Festivalit të Këngës në RTK.
Megjithëse ëndrra që Festivali i Këngës në RTK të bëhet hyrje e Kosovës drejt skenës së madhe të “Eurosongut” mbetet ende e parealizuar, fakti që ky festival po krijon vazhdimësi dhe po forcon një identitet të vetin është shenjë e një kulture muzikore që po përpiqet të rizgjohet. Në një sallë që ngrihet nga hiri për t’u bërë tempull i këngës, krijuesit dhe interpretuesit shqiptarë po gjejnë hapësirë për ta shprehur veten dhe për të ndërtuar një trashëgimi të re artistike. Sfida e anëtarësimit në EBU dhe pjesëmarrjes në “Eurovision” mbetet e madhe dhe jashtë duarve të vetë festivalit, por ndoshta, pikërisht ky përkushtim për të ndërtuar një traditë të qëndrueshme, është hapi më i rëndësishëm për ta bërë atë ëndërr një ditë realitet./KOHA/Katror.info
