Owen Cooper, ylli i serialit “Adolescence”, pritet të shkruajë histori në botën e televizionit pasi është favorit për t’u nominuar për një nga çmimet më prestigjioze në industrinë televizive – Emmy Awards.
Në moshën vetëm 15-vjeçare, Cooper është në rrugën për t’u bërë një nga më të rinjtë ndonjëherë të nominuar në këto çmime.
Cooper, nxënës nga Warrington, e ka bërë debutimin e tij si aktor me rolin e Jamie Miller, një i dyshuar për vrasje në një nga serialet më të ndjekura të Netflix, i cili ka mahnitur kritikët dhe audiencën në të njëjtën kohë.
Mundesh me e lexu edhe…
Performanca e tij ka bërë bujë të madhe dhe është cilësuar si “jashtëzakonisht e pjekur për moshën e tij”.
Aktualisht, rekordin për fituesin më të ri të çmimit Emmy e mban Roxana Zal, e cila në vitin 1984 fitoi në kategorinë “Aktorja më e mirë dytësore” në moshën vetëm 14-vjeçare për rolin në filmin televiziv “Something About Amelia”.
Në anën tjetër, mashkulli më i ri që ka fituar ndonjëherë një Emmy është Scott Jacoby, i cili e mori çmimin për “Aktorin më të mirë dytësor” në moshën 16-vjeçare për dramën “That Certain Summer” në vitin 1973.
Nëse Cooper fiton këtë vit, ai do të thyejë rekordin e Jacoby si mashkulli më i ri fitues i një çmimi Emmy në historinë e ceremonisë.
Një vendim strategjik i bërë nga ekipi i tij është përzgjedhja e kategorisë ku do të garojë, “Aktori më i mirë dytësor” dhe jo “Aktori më i mirë kryesor”, gjë që ekspertët e industrisë e kanë quajtur një “lëvizje gjeniale” që mund t’i rrisë ndjeshëm shanset për të triumfuar.
Ndërsa bota e televizionit pret me padurim shpalljen e listës këtë të martë, sytë janë të gjithë te Cooper – djaloshi britanik që po sfidon rekorde, thyen stereotipe dhe që ndoshta do të hyjë në histori si një nga yjet më të rinj të televizionit me famë ndërkombëtare. /Telegrafi/Katror.info
