Merrni me vete rrobat e larjes herën tjetër që vizitoni Parisin. Për herë të parë pas më shumë se një shekulli, lumi dikur i ndotur Senë është sërish i përshtatshëm për not, falë një fushate shumëvjeçare pastrimi dhe një përmirësimi të shumëpritur të sistemit të kanalizimeve që ishte propozuar që në vitet ’80.
Nën mbikëqyrjen e rojeve të plazhit, banorët e Parisit dhe vizitorët tashmë mund të lahen në tre zona të veçanta: një afër Katedrales Notre Dame, një tjetër pranë Kullës Eiffel, dhe një e tretë në lindje të qytetit.
Kjo shënon një moment historik për lumin ikonë të Francës, i cili po ashtu ka parë rikthimin e jetës së egër. Por Parisi nuk është i vetmi që ka rigjallëruar ujërat e tij, shkruan Positive News, përcjell Katror.info.
Mundesh me e lexu edhe…
Kopenhaga, Danimarkë
Në vitet ’90, Kopenhaga vendosi të bëhet jo vetëm qytet biçikletash, por edhe destinacion për not urban gjatë gjithë vitit.
Dikur një port i ndotur nga mbeturinat industriale dhe ujërat e zeza, gjiri u pastrua përmes investimeve të mëdha në sistemin e kanalizimeve dhe rënies së industrisë së rëndë. Që nga fillimi i viteve 2000, noti është rikthyer në qytet – madje edhe në dimër.
Oslo, Norvegji
Ngjashëm me Kopenhagën, edhe Oslo për vite me radhë vuante nga ndotja industriale në portin e vet. Por projekti “Fjord City” për zhvillimin e portit dhe pastrimin e ujërave solli jo vetëm zona të pastra për larje, por edhe plazhe, kulla hedhjeje dhe sauna buzë ujit, një kombinim ideal për dimrat skandinavë.
Roterdam, Holandë
Dikur porti më i ngarkuar në botë, Roterdami nuk ishte aspak vend për not të egër. Tani, pasi porti është zhvendosur jashtë qytetit, është bërë një përpjekje për pastrimin e lumit Maas.
Janë krijuar zona të gjelbërta urbane, ndërsa Rijnhaven, dikur një kantier detar, është shndërruar në një plazh modern me pemë dhe hapësira për qytetarët. Që nga viti i kaluar, uji është mjaftueshëm i pastër për not.
Amsterdam, Holandë
Rivali i përhershëm i Roterdamit, Amsterdami, ka qenë më herët në këtë rrugëtim. Ndërsa kanalet e qytetit janë ende të turbullta për not, lumi Amstel është i përshtatshëm për larje.
Qyteti ofron një sërë pikash nga ku mund të laheni – nga pontonet buzë lumit deri te plazhet urbane dhe parqet me pemë. Një hartë online i ndihmon vizitorët t’i gjejnë lehtë këto vende.
Basel, Zvicër
Në vitin 1986, lumi Ren mori ngjyrë të kuqe pas një aksidenti kimik që shkatërroi jetën e egër në Basel-Landschaft. Sot, njerëzit lahen pikërisht në atë pjesë të lumit – një dëshmi e fuqisë rigjeneruese të natyrës.
Noti është i zakonshëm në Basel, ku banorët përdorin shtëpi për larje buzë lumit, me dushe, kabina ndërrimi dhe tarraca dielli. Qytete të tjera zvicerane si Bern, Gjenevë dhe Zyrih kanë ndjekur të njëjtin shembull.
Noti urban, një kthim në natyrë në zemër të qytetit
Përmes investimeve në infrastrukturë dhe ndërgjegjësimit për mjedisin, këto qytete evropiane kanë kthyer lumenjtë në hapësira të jetueshme dhe të dashura për qytetarët. Aty ku dikur mbizotëronte ndotja, tani dëgjohet e qeshura e fëmijëve dhe ndihen freskia dhe qetësia e ujit të pastër./Katror.info
