Qendra Kombëtare e Kinematografisë (QKK) në Shqipëri, ka shpallur zyrtarisht thirrjen për paraqitjen e kandidaturave shqiptare në kategorinë “International Feature Film” për edicionin e 98-të të Çmimeve Oscar, që do të zhvillohet në vitin 2026.
QKK u bën thirrje të gjitha shtëpive kinematografike dhe producentëve shqiptarë që të dorëzojnë projektet e tyre si pjesë e procesit të përzgjedhjes së përfaqësuesit zyrtar të Shqipërisë në këtë kategori të rëndësishme ndërkombëtare.
“Afati i fundit për dorëzimin e aplikimeve është data 1 gusht 2025, dhe aplikimi duhet të bëhet pranë Qendrës Kombëtare të Kinematografisë, sipas kritereve dhe dokumentacionit të parashikuar”, thuhet në thirrjen zyrtare.
Mundesh me e lexu edhe…
Kriteret për aplikim
Sipas kushteve të përcaktuara në thirrje, filmat që mund të paraqiten për shqyrtim duhet të jenë të metrazhit të gjatë artistik, dokumentar apo të animuar, me një gjatësi mbi 40 minuta, dhe të kenë pasur ose planifikojnë një shfaqje në kinema ose në platformë VOD për së paku 7 ditë rresht, gjatë periudhës 1 tetor 2024 – 30 shtator 2025.
Gjithashtu theksohet se: “Gjatë periudhës kualifikuese dhe gjatë shfaqjes në kinema, filmi duhet të reklamohet dhe shfrytëzohet në atë mënyrë që konsiderohet normale dhe e zakonshme me praktikat e shpërndarjes së filmave të dedikuar për shfaqje të parë në kinema.”
Ndërkohë, filmat që janë shpërndarë në mënyra të tjera përpara shfaqjes kualifikuese, nuk do të merren në konsideratë.
“Filmat të cilët, në një formë apo tjetrën, realizojnë shfaqje publike jo në kinema dhe shpërndarje para shfaqjes kualifikuese, nuk do të merren në konsideratë për çmimet ‘Oscar’. Shfaqje publike jashtë kinemave konsiderohen të jenë (por jo të kufizuara në): transmetimi dhe televizioni kabllor, PPV/VOD, shpërndarje DVD, shpërndarje gjatë fluturimeve ajrore, transmetime në internet etj”, thuhet në dokumentin zyrtar.
Afati për dorëzim të aplikimeve është 21 korrik 2025.
Në anën tjetër, Kosova ka hapur thirrjen e saj zyrtare në fillim të javës së kaluar, duke shënuar një rikthim në përzgjedhjen për “Oscar” pas dy vitesh mungesë. /Katror.info
