Futbollistja kosovare Lumbardha Misini ka nënshkruar kontratë me ekipin e njohur zviceran, Servette FC Chênois Féminin.
Futbollistja ferizajase e ka bërë edhe një hap të madh në karrierë pas sezonit pozitiv që pati me Trabzonsporin në elitën e futbollit turk, ku bëri njëzet e dy paraqitje dhe e shënoi një gol.
Marrëveshja mes reprezentueses kosovare dhe klubit nga Gjeneva, Servette FC Chênois Féminin është arritur për një vit, me mundësi zgjatjeje kontrate edhe për një vit tjetër.
Mundesh me e lexu edhe…
Lumbardha Misini luan në rolin e mesfushores qendrore dhe te klubi i ri do ta mbajë fanellën me numrin 6.
Ky transferim dëshmon që futbolli i vajzave në Kosovë është në ngritje e sipër, aq më shumë kur një futbolliste e formuar në futbollin vendor, me sukses e vazhdon karrierën në skenën evropiane.
Njëzet e dy vjeçarja pjesën më të madhe të karrierës e kaloi te Hajvalia, luajti edhe në Shqipëri te Vllaznia e Shkodrës ndërsa për Kombëtaren e Kosovës deri më tani i ka bërë 30 paraqitje.
Lidhur me transferimin e Misinit në Gjenevë ka reaguar edhe Federata e Futbollit e Kosovës dhe kryetari Agim Ademi, që i kanë uruar Misinit shumë suksese në aventurën e re dhe këtë angazhim e kanë vlerësuar si dëshmi të cilësisë së futbollisteve tona që tashmë po shkëlqejnë edhe jashtë vendit.
Angazhimi i Misinit në futbollin zviceran i tejkaloi edhe vështirësitë e angazhimit profesional të një futbolliste nga vendet e treta drejtë Zvicrës, shkaku i procedurave të shumta burokratike nga ky vend.
Megjithatë në klubin e Servettit ishin të vendosur për angazhimin e reprezentueses kosovare, dhe marrëveshja u finalizua.
Misini është pritur ngrohtë në prezentimin e parë me fanellën e klubit, në praninë e drejtoreshës sportive Marta Peiro dhe anëtarit të komunitetit shqiptar të Gjenevës, Besmir Ibrahimi, shkruan RTK.
Drejtoresha Peiro u shpreh e lumtur me këtë nënshkrim, duke theksuar se Lumbardha është një lojtare tejet profesioniste, e gjithanshme dhe e disiplinuar.
“Jemi shumë të kënaqur që Lumbardhën do ta kemi me ne për sezonin e ardhshëm”, tha Peiro.
Servette FC Chênois Féminin është dy herë kampion i Zvicrës./Katror.info
