Për herë të 17 me radhë, në Prizren është hapur Panairi i Librit “Prizreni 2025”. Në këtë panair po prezantohen libra nga zhanre të ndryshme, autorë të njohur e të rinj, që kanë për qëllim edukimin e gjeneratave në lexim.
“Ishte një kënd shumë atraktiv, prej këtyre të rejave, nuk e kam bash lehtë të vendosi cilat ti marr, i kisha marrë të gjitha”, tha Filomena Laqi, lexuese.
“Unë me profesion jam psikolog, sigurisht jam i interesuar drejt literaturave shkencore dhe në fushën e psikologjisë dhe më gjerë, jam mëse i kënaqur në këtë edicion të panairit”, tha Rron Kastrati, lexues.
Mundesh me e lexu edhe…
Shtëpi botuese dhe shkrimtarë, prezantojnë për lexuesit botimet e reja dhe më të kërkuara.
“Jam pjesëmarrës i panairit të librit në Tiranë, Prishtinë, Tetovë, Ulqin e Shkup, fill pas luftës zinte vend shprehja, nuk ke ku të hedhësh një mollë nga shumësia që kishte, nga dashuria për librin”, tha Arben Kondi, shkrimtar dhe përfaqësues nga Shtëpia botuese “Çamëria”.
“Shumë kemi mërgimtarë se mbajmë një frymë të atdhedashurisë, ngjyrës së flamurit, kështu që kemi më shumë mërgimtarë që janë blerës dhe konsumues të veprimtarisë sonë“, tha Rudi Berisha, nga Shtëpia botuese “Dardania”.
Librat për fëmijë zënë një vend të rëndësishëm në panaire. Vjollca Zalli thotë se për dy vite mblodhi vjersha, poezi dhe tregime të papublikuara më parë nga revistat e kamotshme, ‘Pioneri’, ‘Fatosi’ etj.
“Një kuriozitet për fëmijët, xhaxhi Shkëlzeni ka qenë gazetarë i fëmijëve në Radio Tirana, edhe Qershiza ka qenë gazetarja e vogël imagjinare që bridhte nga shkolla në shkollë, nëpër grupe fëmijësh, bënte emisione dhe i sillte në Radio Tirana”, tha Vjollca Zalli, shkrimtare për fëmijë.
“Për fat të keq, nuk kemi botime dhe krijime siç kemi pasur dikur, çoftë për fëmijë, çoftë për të rritur, tash letërsia në fb, e ka dëmtuar paksa artin letrar”, tha për RTK Berat Bahtiu, kryetar i Shoqatës së Letrarëve të Prizrenit.
Panairi i librit në Prizren karakterizohet nga një sërë aktivitetesh promovuese të librave dhe autorëve të të gjitha kategorive, deri më 3 gusht./Katror.info
