Lojtari më i mirë i shahut në botë, Magnus Carlsen, ka mposhtur inteligjencën artificiale ChatGPT në një ndeshje online që zgjati vetëm 53 lëvizje – pa humbur asnjë nga figurat e tij.
Në një postim në platformën X, norvegjezi ndau pamje nga loja duke treguar se ChatGPT kishte humbur të gjithë ushtarët, përpara se të dorëzohej.
“Ndonjëherë mërzitem gjatë udhëtimeve,” shkroi ai me ironi.
Pas përfundimit të ndeshjes, Carlsen iu drejtua ChatGPT-së me një koment të shkurtër: “Ishte i pastër dhe i mprehtë. Lojë e mirë!” Ai gjithashtu e komplimentoi për hapjen, por theksoi se në pjesën tjetër të lojës “dështove të më ndjekësh siç duhet”, duke i kërkuar më pas një vlerësim për performancën e tij.
AI-ja e vlerësoi Carlsenin duke e përshkruar lojën e tij si të disiplinuar dhe të saktë, duke e komplimentuar për durimin, vetëdijen taktike dhe teknikën në fazën përfundimtare të lojës.
ChatGPT e vlerësoi performancën e Carlsenit me një renditje të mundshme mes 1800 dhe 2000 në sistemin FIDE ose USCF – megjithëse pranoi se niveli mund të jetë edhe më i lartë.
Sistemi i vlerësimit Elo, i përdorur nga të dyja organizatat – FIDE (Federata Ndërkombëtare e Shahut) dhe USCF (Federata Amerikane e Shahut) – mat nivelin e lojtarëve bazuar në performancën në ndeshje zyrtare, duke marrë parasysh rezultatin dhe rangun e kundërshtarit.
Carlsen aktualisht ka një vlerësim prej 2839 pikësh në renditjen FIDE, duke ruajtur statusin si lojtari më i mirë në botë.
Ai është pesë herë kampion bote në shah, ndërsa titullin e fundit e fitoi më 2021. Që atëherë, ai është tërhequr nga garat për titullin botëror, duke thënë se “nuk kam më dëshirë për të luajtur”./AP/Katror.info