NASA dhe Google kanë nisur një bashkëpunim për të testuar një asistent mjekësor të bazuar në Inteligjencën Artificiale, i cili synon të mbështesë astronautët gjatë misioneve afatgjata, ku komunikimi i menjëhershëm me Tokën nuk është i mundur për shkak të vonesave.
Në kuadër të programit Artemis, që shënon një epokë të re të fluturimeve hapësinore njerëzore, NASA po zhvillon së bashku me Google një provë koncepti për Asistentin Digjital Mjekësor të Ekuipazhit (CMO-DA).
Ky sistem inovativ pritet t’u ofrojë astronautëve mundësinë të diagnostikojnë dhe trajtojnë në mënyrë të pavarur simptomat shëndetësore gjatë misioneve në Hënë apo Mars.
Mundesh me e lexu edhe…
“I trajnuar mbi literaturën e fluturimeve hapësinore, sistemi përdor teknika të avancuara të përpunimit të gjuhës natyrore dhe të mësimit automatik për të analizuar në kohë reale gjendjen shëndetësore dhe performancën e ekuipazhit,” shpjeguan përfaqësues të Google.
Rezultatet e para tregojnë se modeli është i aftë të japë diagnoza të besueshme bazuar në simptomat e raportuara.
Aktualisht, NASA dhe Google po bashkëpunojnë me mjekë specialistë për të testuar dhe përmirësuar më tej këtë teknologji, e cila mund të bëhet një mbështetje thelbësore në misionet hapësinore të thella.
Përveç hapësirës, një asistent i tillë me AI mund të ketë përdorim praktik edhe në mjedise të largëta e të izoluara në Tokë, ku qasja në kujdes mjekësor të specializuar është e kufizuar./AP/Katror.info
