Kursimi i parave shpesh konsiderohet një detyrë e mërzitshme dhe jo gjithmonë motivuese, sidomos kur dëshira për të shpenzuar dhe për të kënaqur veten merr përparësi. Por një trend i ri që po përhapet me shpejtësi në TikTok po e ndryshon këtë perceptim.
Metoda e njohur si “katër kovat” po bëhet virale në rrjetin social, pasi përdoruesit po e cilësojnë si një nga mënyrat më të thjeshta dhe efektive për të organizuar financat personale dhe për të kursyer.
Si funksionon?
Sipas Alex King, trajner financiar dhe themelues i platformës “Generation Money”, parimi është i drejtpërdrejtë: ndaje të ardhurat mujore në katër kategori të ndryshme, secila me një qëllim të qartë. Dy prej tyre janë të dedikuara për shpenzime (nevoja bazë dhe stil jetese), ndërsa dy të tjerat për akumulim pasurie (kursime afatshkurtra dhe investime afatgjata).
Mundesh me e lexu edhe…
“Kjo metodë të ndihmon të sigurosh që nevojat themelore janë të mbuluara, por gjithashtu lejon kursimin për të ardhmen dhe shpenzimet për qejf – pa ndjesi faji,” shpjegon King.
Më pak stres, më shumë vetëdije
Sipas përdorueses së TikTok-ut @bobeema, kjo mënyrë ndihmon për të shmangur stresin që vjen nga ndjekja e imtësishme e çdo shpenzimi. “Është një truk vizual dhe psikologjik që të shtyn të mendosh se ku po shkojnë paratë e tua çdo muaj,” shton King. Kjo vetëdije, sipas tij, ndihmon në marrjen e vendimeve më të mençura financiare.
E përshtatshme për të gjithë
Metoda është veçanërisht e dobishme për ata që janë fillestarë në menaxhimin financiar ose që ndihen se paratë “zhduken” çdo muaj. “Nëse të mungon kontrolli mbi financat, kjo metodë është për ty,” këshillon King.
Personalizimi i buxhetit
Një tjetër aspekt motivues i metodës është personalizimi: në vend të emërtimeve të zakonshme si “kursime” apo “investime”, përdoruesit sugjerohen t’i japin kovave emra më kuptimplotë si “Fondi për pushime” ose “Qetësia mendore”. Sipas ekspertëve, ky personalizim e bën qëllimin më të prekshëm dhe shton motivimin për të kursyer.
Metoda e “katër kovave” po kthehet në një trend me ndikim të madh, duke u bërë një mënyrë kreative për të menaxhuar financat në mënyrë më të ndërgjegjshme dhe të qëndrueshme – dhe më e rëndësishmja, pa stres./Katror.info
