Këngëtarja e hitit “Diamonds”, Rihanna, ka festuar 20-vjetorin e publikimit të albumit të saj debutues “Music of the Sun”, që doli më 29 gusht 2005, duke reflektuar mbi rrugëtimin që nisi kur ajo la ishullin e saj të lindjes, Barbados, në moshën 16-vjeçare për të ndjekur ëndrrën e saj për t’u bërë një yll ndërkombëtar.
Në një postim emocional dhe të gjatë në rrjetet sociale, ajo shkruan: “20 vjet më parë, lashë vendin tim, kulturën time, ushqimin tim dhe familjen time për të nisur një rrugëtim që filloi me publikimin e muzikës sime të parë!”
Rihanna ndau një video me momente kyçe të karrierës së saj – nga hitet që kanë kryesuar klasifikimet muzikore, te sukseset në industrinë e modës dhe bukurisë, duke treguar evolucionin e saj nga një këngëtare e re në një biznesmene miliardere me perandorinë Fenty.
Mundesh me e lexu edhe…
“Shumë prej jush keni qenë pjesë e jetës dhe karrierës sime që nga fillimi, dhe disa jeni bashkuar gjatë rrugës. Jam përgjithmonë mirënjohëse për secilin prej jush. Të gjithë keni pasur një rol kyç në këtë udhëtim!”, ka shkruar ajo.
Duke iu drejtuar fansave të saj të zjarrtë, të njohur si “Navy”, Rihanna shtoi:
“20 vjet me fansat më besnikë dhe më të përkushtuar që nuk e tolerojnë askënd që prek emrin tim. 20 vjet punë të palodhur dhe ekipe të përkushtuara rreth meje, 20 vjet mësimesh, përvojash të paharrueshme dhe arritjesh, 20 vjet që familja ime ka qenë sistemi im më i madh i mbështetjes” , ka thënë ajo. “20 vjet falënderime për ju! E falënderoj Zotin – Ai ka qenë shumë bujar me mua dhe gjithë lavdia i përket Atij!”. /Koha/Katror.info
