Oda Ekonomike Amerikane në Kosovë, në bashkëpunim me Ministrinë e Mbrojtjes së Republikës së Kosovës, ka njoftuar organizimin e edicionit të parë të SharkAthon – Ditës së Inovacionit dhe Investimeve në Dronë, e cila do të mbahet më 8 tetor 2025.
Ngjarja synon të krijojë një platformë ku inovatorët e dronëve do të kenë mundësi të prezantojnë prototipet e tyre funksionale, të demonstrojnë aftësitë teknike dhe të shpalosin vizionin e tyre para një audience të përbërë nga investitorë, përfaqësues të institucioneve dhe partnerë të mundshëm të biznesit.
SharkAthon përfaqëson një kombinim të veçantë midis një dite demonstrimi në stilin e “hackathon”-it dhe një prezantimi të ideve sipas modelit të “Shark Tank”. Qëllimi është që projektet më premtuese të gjejnë mbështetje për të kaluar nga faza e prototipit në atë të prodhimit.
Mundesh me e lexu edhe…
Kriteret e pjesëmarrjes përfshijnë startupet, inovatorët individualë, studentët dhe laboratorët që kanë zhvilluar prototipe funksionale të dronëve, si dhe ekipet që mund të ofrojnë demonstrime të sigurta dhe prezantime të qarta për aplikime praktike.
Procesi i aplikimit bëhet përmes formularit elektronik të publikuar nga organizatorët, ndërsa afati i fundit është 28 shtator 2025. Pas përfundimit të fazës së aplikimit, një ekip i përbashkët ushtarako-civil do të vlerësojë projektet, ndërsa vetëm kandidatët që plotësojnë kriteret teknike do të ftohen për pjesëmarrje.
Organizatorët kanë bërë të ditur se pjesëmarrësit do të kenë mundësi të prezantojnë punën e tyre para partnerëve qeveritarë dhe privatë, të sigurojnë mbështetje financiare, projekte pilot dhe mentorim, si dhe të konkurrojnë për çmime dhe mirënjohje.
Për më shumë informata, të interesuarit mund të kontaktojnë Odën Amerikane në Kosovë përmes adresës elektronike [email protected].
/Katror.info
