Përzgjedhësi i Kombëtares së Kosovës, Franco Foda dhe sulmuesi Fisnik Asllani, në një konferencë për media, kanë folur një ditë para duelit me Suedinë.
Suedezët dhe Dardanët do të përballen sonte në mbrëmje në Goteborg, në kuadër të kualifikimeve për Kupën e Botës 2026.
Foda mendon se Suedia është një skuadër e fortë dhe me shumë cilësi individuale.
Mundesh me e lexu edhe…
“Suedia është një kundërshtar i fortë, me shumë kualitet. Kanë lojtarë të rrezikshëm në fazën sulmuese si Isak, Elanga dhe Gyokeres. Pavarësisht presionit që ata kanë, për ne do të jetë një ndeshje e vështirë,” tha ai.
Strategu gjerman mendon se Kosova do të duhet të jetë shumë e kujdesshme dhe kompakte.
“Suedia nuk është e fortë vetëm në kundërsulme, por edhe në posedim të topit. Ata bëjnë presion të lartë dhe luajnë mirë me pasime. Ne do të luajmë ngushtë, do të jemi kompakt në mbrojtje. Kemi fituar më parë ndaj tyre me një lojë të tillë, dhe do të tentojmë ta përsërisim edhe nesër,” shtoi ai.
“Të gjithë në grup duan vendin e dytë, është një grup i fortë dhe çdo pikë ka rëndësi. Kemi lojtarë cilësorë që mund t’i zëvendësojnë mungesat. Do të ecim përpara me këtë grup dhe me besim”.
“Pres një ndeshje të ngjashme me atë në Prishtinë. E kam parë Suedinë edhe ndaj Zvicrës, janë agresivë dhe të disiplinuar. E vetmja dilemë që kam është se kush do të luajë përkrah Isakut në sulm – Elanga apo Gyokeres”, theksoi Foda.
Optimist për fitore në përballje me Suedinë, është shprehur sulmuesi Fisnik Asllani.
Ai thotë se Kosova ashtu siç ka fituar në ndeshjen e parë mund të fitojë edhe nesër.
“Ashtu siç e fituam ndeshjen e parë mund të fitojmë edhe tash. Gjithsesi në udhëtim ndeshja është shumë e vështirë por ne do të japim maksimumin të marrim pikët që na duhen shumë”, ka thënë Asllani.
Ndeshja Suedi-Kosovë fillon në orën 20:45 dhe transmetohet drejtpërdrejt në RTK./Katror.info
