Edhe pse njihen për aftësitë e tyre digjitale, punonjësit e Gjeneratës Z nuk janë adhurues të punës plotësisht në distancë. Një raport i ri nga Gallup tregon se të rinjtë e kësaj gjenerate preferojnë komunikimin ballë për ballë, në vend të takimeve virtuale, shkruan CNBC, transmeton Katror.info.
Sipas studimit, vetëm 23% e punonjësve të Gen Z shprehen se preferojnë punën tërësisht në distancë — shumë më pak se 35% e përfaqësuesve të gjeneratave të tjera: Baby Boomers, Gen X dhe Millennial.
Jim Harter, shkencëtar kryesor për menaxhimin dhe mirëqenien në vendin e punës në Gallup, tha se këto rezultate ishin të papritura.
Mundesh me e lexu edhe…
“Mund të mendohet se Gen Z do të kishte automatikisht preferencë për punën në distancë, por ata ndihen sikur karriera e tyre po komprometohet nga ky model,” – theksoi ai.
Harter shton se mentoria është veçanërisht e rëndësishme për ata që janë në fillim të karrierës, dhe kjo lidhje është më e vështirë për t’u ndërtuar në mënyrë virtuale. Për më tepër, shumë punonjës të rinj në distancë kanë paqartësi se si puna e tyre lidhet me objektivat më të mëdha të organizatës.
Në të kundërt, 71% e punonjësve të Gen Z preferojnë modelin hibrid, përqindja më e lartë krahasuar me çdo brez tjetër. Ata gjithashtu janë më të prirur të dëshirojnë që kolegët e tyre të jenë më shpesh fizikisht në zyrë.
Megjithatë, puna tërësisht në vend mbetet e papëlqyer për të gjitha gjeneratat — vetëm 6% e Gen Z duan të punojnë gjithmonë në zyrë, krahasuar me 4% të millennialëve, 9% të Gen X dhe 10% të baby boomers.
Një arsye tjetër e rëndësishme për këtë prirje është vetmia. Një studim i Gallup në vitin 2024 zbuloi se një në pesë punonjës ndien ndjesi të theksuar vetmie, me moshat nën 35 vjeç më të prekura.
“Tek Gen Z ekziston një etje për lidhje në person,” – tha Harter.
Sipas tij, liderët kanë përgjegjësi të sigurojnë që punonjësit e rinj të marrin zhvillimin profesional të duhur, përmes ndërveprimeve reale që nuk mund të ndodhin në Zoom.
“Shumë gjëra të rëndësishme ndodhin spontanisht në zyrë – biseda të rastësishme, zgjidhje problemesh, kërkim këshillash. Kush e ka përjetuar, e di ndryshimin,” – shtoi ai.
Për ekipet hibride, zgjidhja mund të jetë planifikimi i ditëve të përbashkëta në zyrë, ndërsa ekipet plotësisht në distancë duhet të fokusohen në biseda kuptimplota për qëllimet dhe sfidat e karrierës.
“Liderët duhet të mendojnë jo vetëm çfarë është e mirë për veten, por për të gjithë ekipin dhe organizatën,” – përfundon Harter.
“Organizatat efektive e kuptojnë këtë dhe ndërtojnë një plan rreth tij.” /Katror.info
Burimi: CNBC
Përktheu dhe përshtati: Katror.info
