Një delegacion i lartë i Bankës Qendrore të Republikës së Kosovës (BQK), kryesuar nga Guvernatori, Ahmet Ismaili, po merr pjesë në takimet vjetore 2025 të Fondit Monetar Ndërkombëtar (FMN) dhe Bankës Botërore (BB), që do mbahet deri më 18 tetor dhe po mbahen në Washington.
“Përfaqësuesit e BQK-së gjatë kësaj vizite zyrtare në SHBA do të zhvillojnë takime bilaterale me drejtuesit e FMN-së, BB-së, Thesarit Amerikan, institucionet tjera financiare ndërkombëtare, si dhe Guvernatorë të bankave qendrore partnere evropiane. Gjithashtu, do të marrë pjesë takime multilaterale për të përfaqësuar vendin si dhe zgjeruar bashkëpunimin në fusha të interesit publik global”, njofton BQK.
Gjatë takimeve, BQK do të prezantojë zhvillimet kryesore dhe prioritetet në sektorin financiar, rezultatet nga zbatimi i programeve dhe asistencave teknike profesionale, si dhe nevojat për mbështetje të mëtejshme teknike në zbatim të mandatit të BQK-së.
Mundesh me e lexu edhe…
Në kuadër takimeve vjetore, Guvernatori Ismaili do të marrë pjesë në panelin e FMN-së të nivelit të lartë me titull “Fuqizimi i qëndrueshmërisë se sistemit financiar në kohëra të pasigurive – Ndërtimi i kapaciteteve në vendet në zhvillim dhe në tranzicion”, i cili do të hapet nga zëvendësdrejtori i sapo emëruar i FMN-së, z. Dan Katz, me pjesëmarrjen e drejtuesve tjerë të FMN-së.
Me atë rast, Guvernatori do të paraqes arritjet kryesore të sistemit financiar të Kosovës, kontributin e FMN-së duke përfshirë Rishikimin e Stabilitetit të Sektorit Financiar (FSSR), në ndërtimin e kapaciteteve institucionale, reformimit të kornizës mbikëqyrëse dhe rregullative, që kanë rezultat me një sistem financiar stabil që mbështet sektorin privat, rritjen ekonomike dhe stabilitetin financiar të vendit.
Gjithashtu, gjatë kësaj vizite, Guvernatori Ismaili së bashku edhe me katër guvernatorët e bankave qendrore të rajonit, do të nënshkruajë me Guvernatorin e Bankës së Italisë, z. Panetta, Letrën e Qëllimit për zhvillimin e sistemit të pagesave të shpejta (instant) – TIPS Clone, për katër bankat qendrore të rajonit, si një projekt rajonal i nisur në fillim të këtij viti.
Me ftesën e FMN-së, Guvernatori Ismaili është i nderuar që të prezantojë zhvillimet kryesore në ekonominë e Kosovës, perspektiven rajonale dhe evropiane, në forumin me dyer të mbyllura që organizohet nga Departamenti për Evropën i FMN-së, dhe ku marrin pjesë Guvernatorët dhe Ministrat e Financave të shteteve nga Evropa, përfshirë ato nga Evropa Qendrore, Lindore dhe Juglindore (CESSE), si një organizim i përvitshëm i FMN-së.
“Takimet vjetore të FMN-së dhe BB-së mbledhin së bashku bankierë qendrorë, ministra të financave, parlamentarë, drejtues të sektorit privat, përfaqësues të shoqërisë civile dhe akademikë, për të diskutuar çështje me rëndësi globale, si perspektivat ekonomike, lufta kundër varfërisë dhe zhvillimi ekonomik”, thuhet në komunikatën e BQK-së./EO/Katror.info
