Katër studio arkitekturore nga Kosova janë nominuar për SHARE Architecture Awards, që do të mbahen në Athinë më 7-8 tetor.
Në total, janë tetë projekte, secili më interesant dhe më i guximshëm se tjetri.
Maden Group, e themeluar në vitin 2009, synon t’i ofrojë Kosovës një studio unike arkitekturore, që sjell rehati, atmosferë miqësore dhe kreativitet.
Ata kanë katër projekte të nominuara në kategori të ndryshme.
- Një prej tyre është AMC Multimedia, një ndërtesë për evente multikulturore, e karakterizuar nga stili brutalist, duke përdorur materialet vendase si betoni dhe blloqet prej baltës.
- Një tjetër projekt, Noya, është një kryevepër kuzhine dhe dizajni, i ndërtuar në katin e 21 në zemër të Prishtinës.
- Projekti i tretë, Duplex Futura, shquhet për përdorimin inovativ të materialeve elastike në mbulimin e mureve.
- Shtëpia Dhija e Kuqe është një shtëpi trekëndore që maksimizon dritën natyrale dhe ofron një pamje të veçantë për çdo hapësirë të saj.
Studio ARTEC është studio e specializuar në banim, dizajn të brendshëm dhe hapësira publike të gjalla.
- Projekti i tyre Pristine Original përmban një skemë të gjallë ngjyrash, duke theksuar ngjyrën portokalli të verdhë.
- Gjithashtu kanë një projekt të nominuar, Buzuku I, një librari që sfidon konceptin tradicional të librarisë si një vend thjesht për të blerë libra.
Arkitektët G+A, me zyrë qëndrore në Zvicër dhe Kosovë, janë nominuar me projektin Xhamia në Tupalla, e cila përveç hapësirave rituale islame ofron një mjedis universal për meditim.
LOKUS, një platformë arkitekture dhe dizajni nga Prishtina, konkurron me projektin The Horizon Education Center, një transformim i hapësirës tregtare në një qendër mësimore për fëmijët e shkollave fillore.
SHARE Architecture Awards është ngjarje prestigjioze ndërkombëtare që nderon ekselencën në fushën e arkitekturës dhe inxhinierisë. Ky çmim është pjesë e një platforme më të gjerë, SHARE Architects, e cila bashkon arkitektë, inxhinierë dhe profesionistë të ndërtimit nga e gjithë bota për të shkëmbyer ide, përvoja dhe inovacione në dizajnin arkitekturor dhe urban.
SHARE Architecture Awards synon të nderojë projektet më të mira që demonstrojnë kreativitet, funksionalitet dhe ndikim pozitiv në mjedis dhe komunitet. Eventi është një mundësi për profesionistët e arkitekturës të prezantojnë projektet e tyre në skenën ndërkombëtare dhe të ndajnë filozofinë e tyre të dizajnit.
Ceremonia e ndarjes së çmimeve zakonisht organizohet në qytete të ndryshme evropiane dhe ofron një platformë për dialog dhe diskutim mbi trendet më të fundit në arkitekturë. Kategori të ndryshme çmimesh përfshijnë projekte të ndërtuara dhe të papërfunduara në fushat e banimit, komerciale, kulturore, edukative, ndërtesa publike, restaurime historike dhe më shumë./Katror.info
Përgatiti:
