Janë mbledhur për të festuar një moment historik në qasjen ndaj dijes për komunitetin shqiptar.
Gjuha shqipe në Wikipedia tashmë ka arritur 100 mijë artikuj të publikuar, shifër kjo e njëjtë e artikujve që ka edhe vetë Enciklopedia Britannica.
Kjo arritje është rezultat i punës së palodhshme të një komuniteti të përkushtuar vullnetarësh, të cilët kanë dhënë kontribut të çmuar në dy aspekte kryesore: shtimin e artikujve dhe publikimin e fotografive.
Mundesh me e lexu edhe…
Ismet Azizi, gjeograf, ka shfrytëzuar njohuritë e tij për të rritur qasjen në informacione historike, gjeografike e me gjerë.
“Kur kam hy në Wikipedia edhe kam lexu, e kam pa menjëherë që ka nevojë me pasë informacione të reja dhe kështu kam fillu edhe me lexu, me marrë informacione, por edhe me dhanë. Ka qenë njëfarë sfide për mua interesante që nëse shoh diçka që mungon, kam fillu me shtu dhe mandej jam motivu shumë, edhe një kohë, diku 10 vite kam qenë ditë e natë në Wikipedia. Ka qenë interesant për mua se përveç mësimdhënies që iu kam ofruar njerëzve mundësi me pa ku munden me marrë informacione të reja që ishte fillimi pas luftës ka qenë shumë interesant teknologjia, njerëzit trajnoheshin, por ishte interesant me i motivu të rinjtë me marrë informacione nga Wikipedia. Është një fushë shumë karakteristike që na mundemi me ba një diplomaci publike të hatashme në Wikipedia. Unë e kam pasë një aktivitet para gjashtë viteve në Ministrinë e Punëve të Jashtme me rastin e 10 vjetorit të pavarësisë së Kosovës kemi punu dy muaj me studentë edhe me nxënës, vërtetë ka qenë fantazi, sepse i kemi bo 400 artikuj brenda muajit”, shprehet Azizi.
Profesorët me njohuritë e tyre të thella, kanë kontribuar në saktësinë dhe cilësinë e materialeve, duke garantuar që përmbajtja është e mirë-dokumentuar dhe relevante për lexuesit shqiptarë.
Nga ana tjetër, kontributi me publikimin e fotografive ka ndihmuar në ilustrimin dhe vizualizimin e artikujve, duke bërë që informacionet të jenë më tërheqëse dhe më të kuptueshme për lexuesit, për të cilën Azizi thotë se ka një rëndësi të veçantë informative, si dhe është kontribut i lehtë me të cilën mund të fillohet puna me Wikipedia.
“Unë nuk shkon java, si të dal në terren, diku në natyrë, ose vizitoj një qytet, kur kthehem diçka ngarkoj në Wikipedia. Edhe plotësoj artikull edhe i kontrolloj, sepse jam edhe administrator, por fotografitë janë diçka që shumë lehtë bohen, prandaj me një telefon të thjeshtë tash telefonat janë shumë të mirë, mundemi me tri-katër fotografi në muaj me dhanë kontribut secili prej nesh që del në terren. Bota kishte me na njoftë shumë më shumë. Po puna më të lehtë që mundemi me bo për vendin tonë është Wikipedia edhe Wikicommons me një fotografi, me një artikull, sepse njerëzit përkthejnë mundësia për me i lexu artikujt në shqip, nëse s’dimë anglisht është shumë e madhe. ”, thotë Ismet Azizi.
Duke qenë se Wikipedia shpesh konsiderohet si burim jo kredibil për shkak të futjes së informacioneve pa mbështetje shkencore e studimore, rëndësi të veçantë të kontributdhënies ka editimi dhe rregullimi i mangësive të informacioneve nga dora e parë.
Gëzim Bullaku, mësimëdhënës, u fokusua veçanërisht në këtë çështje.
“Kontributin e kam filluar krejt rastësisht, diku në vitin 2015, më interesonin disa gjëra edhe shihja që diçka nuk është në rregull aty edhe duhej me qenë ndryshe. Ndërkohë kuptova se mund të kontribuojmë, mund të rregullohen ato të dhëna që janë të gabuara, fillova një herë gati si eksperimentale, si herë me llogari, herë pa llogari pastaj ndërkohë krijova llogarinë, fillova me kontribu në kohën e lirë më dukej interesant, më dukej diçka e mirë edhe shihja dhe mungesën e artikujve në gjuhën shqipe për shumë tema për shumë fusha”, thotë Bullaku.
Bullaku thekson se puna me Wikipedian është kontribut i kthyeshëm, dhe njëherit mundëson edhe rritje individuale.
“Sa më shumë që punoja, rritej inspirimi, rritej, vetëbesimi, kontributi, ndërkohë unë kam kuptu që edhe regjistrohen kontributet. Mund të kontribuosh, po ajo që kontribuon ti, ajo nuk humb, mbetet aty e regjistruar dhe mund të shihet edhe nga të tjerët se çka ke kontribuar. Një tjetër gjë është shumë e mirë që aty mëson të bashkëpunosh me njerëz të kulturave të ndryshme, me njerëz të pikëpamjeve të ndryshme, të jesh komunikativ, të jesh tolerant, të jesh në harmoni me ato rregulla që janë themelore të një Wikimediani”, shprehet tutje Bullaku.
Arianit Dobroshi, anëtar i Bordit te Wikimedianët e Gjuhës Shqipe, cili organizoi eventin festiv të kësaj arritjeje, ndau me audiencën disa fakte dhe kontribute kyçe në rritjen e kësaj platforme në gjuhën shqipe.
Ndërsa theksoi se kontributi është rritur por ka ende shumë nevojë për vullnetarë të cilët sjellin ekspertizat e tyre në fusha të ndryshme për të krijuar artikuj sa më detajues dhe të besueshëm.
“Kisha thënë që është rritë kontributi. Normalisht edhe mjetet janë përmirësu mjete teknike, janë përmirësu burimet, është rritë ndoshta edhe ueb-i shqiptar, ose në gjuhën shqipe edhe për temat tona. Kështu që gjithë këto kanë kontribut që me u pasuru edhe Wikipedia për shkak se Wikipedia bazohet në burimet dytësore edhe domethënë nëse ato nuk janë të mira edhe Wikipedia e reflekton atë”, shprehet Dobroshi.
Rita Maliqi, projekt menaxhere për Grupin për Kosovë, theksoi se po punohet vazhdimisht për të përforcuar burimet e informacioneve sa më të sakta në gjuhën tonë.
“Të gjithë e dimë që pak a shumë thonë mos u referoheni në Wikipedia, por kjo është arsyeja se nuk po kemi mjaftueshëm burime, cilat mundemi me iu referu, po tani jemi të lumtur që po ka libra të ri që po shkruhen, arkiva që po hapen, kena digjitalizu edhe Rilindjen, gazetën edhe Bujkun edhe tani po mundohemi me i përdorë këto që i kemi për me pasuru sa më shumë Wikipedian”, shprehet Maliqi.
Ndërthurja mes dijes dhe vizualizimit e bën Wikipedia-n shqip një burim të gjithanshëm për komunitetin dhe për të tjerët që duan të mësojnë më shumë rreth shqiptarëve, prandaj ndjehet edhe nevoja e shtimit të sa më shumë ekspertëve.
“Normalisht ka sfida gjithmonë si popull ndoshta nuk jemi të njoftuar për kontribut në projekte vullnetare siç është ky, domethënë numri i kontribuuesve nuk është shumë i madh. Kemi nevojë me pasë më shumë njerëz, kemi nevojë për diversitet më të madh profesione të ndryshme me u përfshi, për shembull, po mendoj për momentin mjek ndoshta artista që mi mbulu artin, edhe pse kjo mundet me u mbulu prej kujtdo, po kjo kish me pasuru Wikipedian shumë ma shumë’’, shtoi Arianit Dobroshi.
Duke qenë se Wikipedia është një platformë e hapur dhe falas, çdo shqiptar, pavarësisht vendndodhjes, tani ka mundësi të qaset në një burim të pasur me informacione të ndryshme, që ndihmon në zhvillimin e edukimit, ruajtjen e trashëgimisë kulturore dhe përforcimin e identitetit kombëtar. /Katror.info
Edicionin e plotë #65 e gjeni këtu🙂
Përgatiti:
