Banka Qendrore e Republikës së Kosovës (BQK) ka miratuar Udhërrëfyesin Strategjik për Menaxhimin dhe Mbikëqyrjen e Rreziqeve të Lidhura me Klimën dhe Mjedisin në sektorin financiar. Dokumenti, i cili do të zbatohet gjatë periudhës 2025-2027, synon të krijojë një kornizë rregullative dhe mbikëqyrëse që adreson rreziqet klimatike dhe mjedisore, në përputhje me Planin Strategjik të BQK-së, shkruan Katror.info.
Në komunikatën e saj, BQK-ja theksoi se ky udhërrëfyes reflekton zotimet e Kosovës si nënshkruese e Deklaratës së Sofjes dhe kandidat potencial për anëtarësim në Bashkimin Evropian. Përveç kësaj, dokumenti është hartuar duke ndjekur standardet më të mira ndërkombëtare dhe evropiane për identifikimin, vlerësimin dhe menaxhimin e rreziqeve klimatike dhe mjedisore nga institucionet financiare.
Udhërrëfyesi është hartuar me mbështetjen e Qendrës Këshilluese për Sektorin Financiar (FinSAC) të Bankës Botërore dhe përfshin instrumente për financim të qëndrueshëm dhe standarde të qeverisjes mjedisore, sociale dhe të korporatave (ESG). BQK-ja vuri në dukje se ky angazhim është pjesë e përpjekjeve të saj për të garantuar stabilitet financiar dhe për të rritur gatishmërinë ndaj sfidave klimatike.
Mundesh me e lexu edhe…
Në linjë me këtë strategji, BQK ka ndërmarrë disa hapa konkretë. Në prill të vitit 2024, miratoi një udhëzues për raportimin e ekspozimeve kreditore të lidhura me kostot e tranzicionit mjedisor, duke përfshirë të dhëna për ndikimin e mundshëm të këtyre rreziqeve në sektorin bankar. Gjithashtu, BQK ka avancuar politikat e saj investuese për të përfshirë instrumente të financimit të qëndrueshmërisë dhe është anëtarësuar në Rrjetin e Bankimit dhe Financave të Qëndrueshme (SBFN).
“BQK-ja falënderon Fondin Monetar Ndërkombëtar dhe Bankën Botërore për mbështetjen e vazhdueshme në funksion të ngritjes së kapaciteteve dhe avancimit të kornizës rregullative dhe mbikëqyrëse,” thuhet në komunikatën e bankës qendrore.
Udhërrëfyesi Strategjik i BQK-së për sektorin financiar është një hap i rëndësishëm drejt forcimit të qëndrueshmërisë klimatike dhe përputhshmërisë me standardet ndërkombëtare, duke kontribuar në zhvillimin afatgjatë të ekonomisë së Kosovës./Katror.info
Përgatiti:
