Procesi i digjitalizimit të arkivit të Radio Prishtinës është përfunduar me sukses, duke rikthyer rreth 11 mijë materiale në format digjital, shkruan Katror.info.
Ky projekt ka transformuar një pjesë të rëndësishme të trashëgimisë kulturore të Kosovës, e cila përfshin këngë, radiodrama, fjalime politike dhe materiale muzikore të krijuara nga viti 1954 e tutje.
Drejtori i Radio Kosovës, Arsim Halili, e përshkroi këtë arritje si një mision të transmetuesit publik. “Materialet janë tërësisht të digjitalizuara, prej shiritit të parë deri në të fundit,” u shpreh Halili për emisionin “Mirëmengjesi Kosovë” në RTK, duke theksuar rëndësinë e këtij procesi për ruajtjen e historisë kulturore.
Mundesh me e lexu edhe…
Gjatë këtij projekti, i cili zgjati 19 muaj, janë digjitalizuar gjithsej 10,723 shirita, me një kohëzgjatje prej mbi 3,700 orësh. Halili tregoi se për realizimin e këtij procesi u angazhua një ekip ekspertësh, përfshirë ish-punonjës të Radio Prishtinës, dhe se procesi u përball me sfida, por u finalizua me standarde ndërkombëtare.
“Kemi pasur takime të rregullta me stafin e produksionit, me ekspertët që kanë qenë të ‘Radio Prishtinës’, që tashmë veç janë pensionuar. Ata na kanë ndihmuar me ekspertizë, se si t’i qasemi këtij procesi. Ka pasur dilema të ndryshme për t’i ndjekur standardet e ndryshme ndërkombëtare që janë për arkivimin e materialeve. Pasi i kemi zgjedhur këto dilema, kemi kërkuar ndihmë prej ‘Radio Shkupit’, për shkak se është dashur të kemi një shirit testues, i cili do ta bëjë kalibrimin e kētyre pajisjeve që ne i kemi pasur në dispozicion, dhe pas një përgatitje dymujore, e kemi filluar këtë proces”, u shpreh Halili.
Materialet digjitalizuara përfshijnë një gamë të gjerë zhanresh dhe janë ruajtur edhe në gjuhët e komuniteteve të ndryshme, duke pasqyruar diversitetin kulturor të vendit. Kjo arritje pritet të shërbejë si burim i vlefshëm për studiuesit dhe artdashësit, duke mbrojtur një pjesë të rëndësishme të historisë së Kosovës./Katror.info
Përgatiti:
