Iniciativa Studentore për Novacion 68 mbajti aksion protestues, sipas tyre, ndaj mungesës së hapësirave të dedikuara për studentët për aktivitete kulturore dhe artistike, si dhe ndaj neglizhencës së menaxhmentit të Qendrës së Studentëve, raporton Ekonomia Online.
Bujar Hoxha, anëtar i kësaj organizate, tha se aktivitetet e tyre janë duke i mbajtur ne rrugë në mungesë të hapësirave brenda Qendrës së Studentëve.
“Sot, më 11 mars 2025, siç po shihet kemi vendosur që aktivitetet tona t’i mbajmë në rrugë në mungesë të hapësirave brenda Qendrës së Studentëve. Sallat ku duhet të organizonim debate, leksione alternative, klube kulturore dhe artistike janë të mbyllura për ne. Në vend të hapësirave për studentët, kemi zyra administrative, hapësira komerciale dhe dyer të kyçura. Rrjedhimisht, na kanë detyruar të dalim në rrugë për të mbajtur aktivitetet tona. Kjo nuk është hera e parë që studentët ngrihen për të drejtat e tyre”.
Mundesh me e lexu edhe…
Hoxha rikujtoi se më 11 mars 1981, studentët e Universitetit të Prishtinës protestuan për liri, duke theksuar se sot, ne po përballemi me një tjetër formë shpërfilljeje: nuk na japin hapësirën për të menduar, për të bashkëpunuar, për të krijuar.
“Na duan pasivë, nëpër kafene të qytetit dhe pa mundësi për të zhvilluar mendimin kritik dhe kreativitetin tonë. Por studentët nuk do të heshtin! Nëse nuk na lejojnë hapësira brenda, ne do t’i marrim rrugët! Nëse na mbyllin dyert, ne do të vazhdojmë të krijojmë, të organizohemi dhe të kërkojmë atë që na takon! Sot nuk kërkojmë lëshime, por të drejtat tona! Ne nuk do të ndalemi derisa aktivitetet studentore të kenë hapësirat e tyre të merituara”, ka thënë ai.
Ilir Kiçmani, tha se problemi qëndon të menaxhmeti i QS që sipas tij, nuk ju ka dhënë atyre shpjegim nëse ka hapësira që studentët t’i zhvillojnë aktivitete e tyre.
“Ne kemi dërguar email ku kemi kërkuar hapësirë për mbajtjen e aktitiviteve, menaxhmenti i ka shpërfillur të gjitha kërkesat tona. Kemi dërguar email edhe të sekretari i MASHT-it as ai nuk ka kthyer përgjigje për neglizhencën e menaxhmentit të QS. Ne nuk e dimë a ka hapësirë, për aq sa dimë salla e konferencave ku ne kemi mbajtur aktivitete në të kaluarën është kthyer në zyre dhe përdoret për Agjencinë e Akreditmit të Kosovës. Sipas informacioneve që ne i kemi, Amfiteatri i hapur që është aty ku ne kemi mbajtur shumë aktivitete tradicionale deri me sot kemi marrë informacione se do të rrënohet dhe do të kthehet në konvikt për banim”, tha Kiçmani./Katror.info
Përgatiti:
