Një prej festivaleve më kreative dhe me mesazh të shumëfishtë është Festivali i Baballarëve. Përveç pjesës argëtuese në raportet baba – fëmijë që sjellë çdo vit në hapësirat publike të Prishtinës, ky festival edhe potencon çështje si barazia gjinore e roli i babait në familje moderne.
Mirëpo sivjet organizatorët kanë vendosur që qëllimin ta përmbushin pikërisht në Prizren me datë 18 qershor. Me disa aktivitete përgjatë ditës, ata po synojnë që të nisin decentralizimin e idesë së këtij festivali. Ndërkaq ndryshimet në perceptime dallohen nga viti në vit falë këtij organizimi.
“Në fillim, kjo ishte një temë e re në komunitetin tonë dhe festivali ka luajtur një rol të rëndësishëm në sensibilizimin e njerëzve rreth kësaj çështjeje. Një rast konkret që tregon ndryshimin është historia e një babai që në vitin e dytë të festivalit ka patur dyshime dhe hezitime për të marrë pjesë, por në edicionin e tretë ai ishte i pranishëm përsëri me familjen dhe shoqërinë e tij. Kjo tregon se festivali ka ndikuar në ndryshimin e perceptimeve dhe vlerësimit të roli të baballarëve”, tha për Katror Media Njomza Berisha, menaxhere per Zhvillim dhe Programe në organizaten SIT.
Mundesh me e lexu edhe…
Tutje ajo theksoi se edhe Festivali i Baballarëve është festival i posaçëm për të frymëzuar baballarët të jenë të vëmendshëm dhe të angazhohen aktivisht në edukimin dhe rritjen e fëmijëve.
“Me qëllim që të arrijmë një audiencë të re dhe për të diversifikuar festivalin, vendosëm të transferojmë ngjarjen në Prizren. Kjo zgjedhje na ka dhënë mundësinë të eksplorojmë një qytet të ri dhe të sjellim festivalin për të krijuar një impakt të veçantë”, tha tutje Berisha.
Programi është i pasur me ngjyrosje të fytyrave të fëmijëve, lexime të tregimeve e lojëra argëtuese. Ndërkaq ato që marrin më shumë vëmendje ndër vite janë:
–Baba VS Nana: Një lojë argëtuese e cila paraqet sfidën mes baballarëve dhe nanave në pyetje të ndryshme rreth fëmijës së tyre.
-Arte dhe Zanate: Një hapësirë ku fëmijët dhe baballarët eksplorojnë imagjinatën e tyre në krijimin e veprave të ndryshme artistike.
– Gara e Baballarëve: Një garë ku baballarët përballet në sfida nga më të ndryshmet: ndërrimi i pelenave të fëmijëve, pastrimi, gatimi, etj. Kjo garë zhvillohet mes minimumi dy baballarëve që marrin pjesë në edicion. Njëherësh, vendet e para marin shpërblime.
Ky festival implementohet në kuadër të projektit “E Ardhmja për Rininë” nga SIT me mbështetje nga UNFPA zyra në Kosovë, CARE International në Ballkan, Agjensioni Austriak për Zhvillim, Fondacioni Oak, K10. / Katror.info
Përgatiti:
