Në epokën e rrjeteve sociale, një mesazh i thjeshtë mjafton për të rifilluar një miqësi të vjetër. Por, ndonëse teknologjia e ka bërë më të lehtë rilidhjen, kjo nuk do të thotë që gjithmonë është zgjedhja e duhur.
Psikologë dhe studiues theksojnë se para se të ndërmarrësh një hap të tillë, është e rëndësishme t’i bësh vetes disa pyetje thelbësore.
Një vendim emocional, por që kërkon vetëdije
Rilidhja me një mik nga e kaluara mund të duket ngushëlluese – veçanërisht kur ndihesh i lodhur nga ndërtimi i lidhjeve të reja. Por sipas një studimi të publikuar në vitin 2024, rikthimi i miqësive të vjetra mund të jetë po aq sfidues sa krijimi i lidhjeve të reja, dhe në disa raste edhe më i ndërlikuar.
Mundesh me e lexu edhe…
Psikiatrja Naama Hofman, nga Icahn School of Medicine në Nju Jork, thekson se miqësitë shpesh pasqyrojnë një periudhë të caktuar të jetës, dhe kthimi pas nuk është gjithmonë i nevojshëm. “Të lësh diçka pas krahëve mund të të ndihmojë të kuptosh më mirë ku ndodhesh tani,” thotë ajo.
Ajo sugjeron që pyetja më e rëndësishme nuk është “çfarë shkoi keq?”, por “çfarë do të fitoj duke e rikthyer këtë lidhje?”. Sepse, siç shton ajo, miqësitë nuk janë gjithmonë të përjetshme, me kalimin e kohës, vlerat dhe prioritetet tona ndryshojnë, dhe me to edhe marrëdhëniet.
Pyetje që ia vlen t’ia bësh vetes:
- A ndihesh në ankth apo nervoz kur mendon për këtë mik/mike?
Nëse po, kjo mund të jetë një shenjë që plagët nuk janë shëruar ende. - A është ai/ajo vërtet i interesuar për ty si person sot, dhe jo vetëm si kujtim?
Një miqësi e shëndetshme kërkon respekt të ndërsjellë dhe interes të sinqertë. - A ndihesh i/e nënvlerësuar apo i/e gjykuar në këtë raport?
Nëse po, ndoshta është më mirë të mos e rikthesh një marrëdhënie që të dëmton. - A ka raporti balancë?
Miqësitë e qëndrueshme nuk janë të njëanshme. Ajo që jep, duhet të pasqyrohet edhe në atë që merr.
Të rilidhesh apo të ecësh përpara?
Psikologia klinike Claudia Diez nënvizon rëndësinë e të zgjedhurit me vetëdije. “Edhe nëse personi tjetër ka kërkuar falje, je në të drejtën tënde të vendosësh që kjo marrëdhënie nuk të shërben më,” thotë ajo.
Madje, sipas saj, vendimi për të mos u rilidhur mund të jetë fuqizues dhe të sjellë qetësi emocionale.
Në rast se vendos ta kontaktosh sërish një mik të vjetër, është e rëndësishme të reflektosh: pse u larguat në fillim?
A ishte një moment i keqkuptuar, një situatë emocionale apo thjesht rrugë që u ndanë natyrshëm? Kjo vetë-analizë të ndihmon të kuptosh se çfarë ke mësuar dhe çfarë kërkon tani nga një miqësi.
Psikologët këshillojnë gjithashtu të mos e marrim si të mirëqenë idenë që mund të vazhdojmë aty ku e lamë. Një bisedë e sinqertë, idealisht ballë për ballë, është e domosdoshme për të kuptuar nëse një miqësi e re mbi një bazë të vjetër ka vërtet potencial.
Një histori personale
Në fund të artikullit të saj për The Washington Post, autorja ndau një përvojë personale: një mik i vjetër i cili ishte larguar nga jeta e saj për shkak të pasigurive të gruas së tij ndaj saj, si një grua e divorcuar. “Në atë kohë, kjo më dhembi shumë. Por tani, ai është gati të rikthehet në jetën time. Dhe unë e kujtova sërish sa shumë qeshnim bashkë,” shkroi ajo.
Edhe pse dhimbja e së kaluarës nuk është zhdukur krejt, sot ajo dhe miku i saj po ndërtojnë diçka të re, të mbështetur jo vetëm mbi kujtimet, por mbi rritjen dhe kuptimin e ndërsjellë si të rritur.
Në fund të ditës, nuk ka përgjigje të saktë për të gjithë. Por vetëdija, sinqeriteti dhe reflektimi janë hapat më të rëndësishëm për të vendosur nëse një mik i vjetër ka vend në kapitullin tënd të ri. /Katror.info
Përgatiti:
