Për vite me radhë, fillon ditën në orën pesë të mëngjesit gjatë verës dhe në orën shtatë gjatë dimrit. Një nga gjestet më të bukura dhe të përditshme të tij është të përkujdeset për pëllumbat duke treguar një humanizëm të veçantë.
Është ky Avdil Ibishi, i cili në një botë ku sfidat shpesh shihen si barriera, i ka kthyer ato në motiv për veprim.
I lindur në Bujanoc, Ibishi, edhe pse me aftësi të kufizuara, nuk e ka lejuar kurrë këtë të përcaktojë potencialin e tij. Tash kur jeton në Gjilan, ai me vullnet e përkushtim ka ndërtuar një rrugë që nuk i shërben vetëm atij, por edhe të gjithë atyre që kanë nevojë për një zë në shoqëri.
Mundesh me e lexu edhe…
Që prej 16 vitesh, Avdili është i përkushtuar në punën e tij, duke treguar se pavarësisht sfidave fizike, vendosmëria dhe përkushtimi janë forcat e vërteta që e shtyjnë përpara. Ai nisi të angazhohej në aktivitete dhe punë që në moshë të re, duke mos pranuar të mbetet i kufizuar nga rrethanat.
”Një kohë gjatë luftës personat me aftësi të kufizuar shumë pak i ke pa nëpër qytet, thuajse n’gishta si në Gjilan, si në Bujanoc, si në Preshevë çdo herë, thuajse veç Avdil Ibishin e kanë parë si me aftësi të kufizuar e të tjerët shumë rrallë janë kanë të mbyllur brenda katër mureve, nuk do të thotë që e kam pas një liri të madhe prej familjes, por vetë jam kanë i interesuar dhe nuk kam dashtë me qëndru i mbyllur brenda katër mureve që mos me dalë me më pa dikush pse jam person me aftësi të kufizuar”, shprehet Avdil Ibishi.
Përkushtimi i tij nuk ndalet vetëm në aspektin personal, por shtrihet edhe në aktivizmin qytetar, ku si vullnetar ka qenë dhe vazhdon të jetë një zë i rëndësishëm për personat me aftësi të kufizuara ne Gjilan.
”Unë jam kanë zëri i fuqishëm dhe sot jam një zë i fuqishëm për mbrojtjen e pamarrë parasysh një komuniteti ose të atyre me aftësi të kufizuara ose punëtorëve që ju shkelen të drejtat… Sa i përket punës, këtë punë e bëj me plot vullnet dhe kam respekt edhe kam komplimente prej qytetarëve të Komunës së Gjilanit, se çdo pjesë e qytetit ku marrë pjesë unë me ekipin tim, me të vërtetë është shumë i pastër”, thotë ai.
Përveç angazhimit në komunitet, Avdili ka qenë edhe sportist i suksesshëm, ku nga viti 2003 deri në vitin 2019 ka përfaqësuar Kosovën në gara të atletikës dhe basketboll për persona me aftësi të kufizuar dhe ka fituar çmime të para në këto gara sportive, duke treguar se asgjë nuk është e pamundur kur ka vullnet dhe përkushtim.
”Kam qenë shumë aktiv dhe kam marrë pjesë nëpër shumë gara edhe në vend siç është atletika për persona me aftësi të kufizuara dhe basketbolli. Sot mundeni me shku me vizitu degën e Hendikos-it, ku është arkiva e gjithë atyre kupave e medaljeve të sjellura, prej këtyre 10 gishtrinjëve. Kam qenë kryetar i klubit të basketbollit, kam sjellë donacione, kam sjellë merita të mëdha komunitetit tim me aftësi të kufizuara, po edhe qytetit të Gjilanit, duke u përfshi në shumë pjesëmarrje si në Zvicër, në Gjermani – në basketboll e në atletike. Në Slloveni, në Kroaci, s’ka pasë vend që s’kam marrë pjesë, do të thotë brenda asaj periudhe”, thekson Ibishi.
E përtej aktivizmit të tij personal, Avdili është bërë një adresë kyçe për shumë persona me aftësi të kufizuara. Si avokues dhe ndërmjetësues, ai ka ndihmuar që shumë çështje të tyre të adresohen tek institucionet përkatëse.
Me përvojën dhe përkushtimin e tij, ai ka ngritur zërin për të drejtat e komunitetit që përfaqëson, duke kërkuar më shumë përfshirje dhe mbështetje institucionale. Para shtatë vitesh, ai vendosi të marrë një hap më të madh duke kandiduar për asamblenë komunale të Gjilanit. Qëllimi i tij ishte të përfaqësonte zërin e personave me aftësi të kufizuara brenda institucioneve, por fatkeqësisht, nuk mori votat e nevojshme për të fituar një vend në asamble. Megjithatë, ai nuk u ndal. Përmes angazhimit të tij të vazhdueshëm, Avdili vazhdon të bëjë thirrje që institucionet të krijojnë kushte më të mira për këtë kategori qytetarësh, duke siguruar që askush të mos mbetet i përjashtuar nga jeta publike dhe sociale.
”Komuniteti me aftësi të kufizuar asnjëherë nuk duhet ta ndjejnë veten që janë njerëz me aftësi të kufizuar, duhet të luftojnë për të drejtat e veta, duhet të shkollohen të luftojnë për një pozitë, vend pune që me të vërtetë ju përshtatet, se me të vërtetë edhe ligji është që do të thotë çdo kompani që i ka 50 punëtorë, një plus duhet me pasë me aftësi të kufizume, jo me ia dhanë rrogën e me lanë te shpija, me i thanë t’i rri të te shpija se s’po më duhesh, po duhet me punësu edhe me kry orarin e punës. Po institucionet e dalë nga shteti i Republikës së Kosovës, janë duke i shkelë me të madhe, sidomos ligjin për gjithëpërfshirjen, ku ka kategori të cilat janë të anashkaluara sidomos shurdhëmemecët, të flasim për një pjesë gjysmë të verb që janë, janë fëmijët nën moshën 18 vjetët e poshtë të cilët sot thotë Ministria e Punës dhe Mirëqenies Sociale, i mbështes me nga 50 euro, ajo është një lëmoshë, ajo është vërtetë një shkelje shumë e rëndë e të drejtave të njeriut edhe të gjithë njerëzve me aftësi të kufizuar”, shprehet ai.
Ndërsa sot, ai iu bën thirrje personave me aftësi të kufizuara që të aktivizohen dhe të përfshihen sa më shumë.
”Mesazhi për personat me aftësi të kufizume është që ata të lobojnë deri në pikën e fundit, mos të dorëzohen se do të jenë fitimtarë, e për institucionet e Kosovës kisha apelu që të bëjnë projekte, të bëjnë plane zhvillimore që t’i nxisin ata personat me aftësi të kufizuara që të dalin, të punojnë sepse Qeveria e Kosovës si ajo nacionale si ajo komunale, shumë pak kanë bërë deri tash”, përfundoi ai.
Historia e Avdil Ibishit dëshmon se forca e njeriut nuk maten nga kufizimet fizike, por nga dëshira për të kapërcyer çdo sfidë. Ai është shembulli i një qytetari të angazhuar, një avokuesi të palodhur dhe një njeriu që çdo ditë jeton me qëllimin për të bërë ndryshim. /Katror.info
Edicionin #73 të plotë e gjeni këtu!🙂
Përgatiti:
