I mërzitur dhe duke kërkuar diçka për të bërë këtë verë, Danny Doherty planifikoi të mblidhte para për ekipin e hokejit të vëllait të tij duke shitur akullore të bërë në shtëpi.
Por disa ditë pas vendosjes së stendës dhe shërbimit të akullores për rreth 20 persona, familja e Dannyt mori një letër nga Bordi i Shëndetit në Norwood që urdhëronte mbylljen e kioskës. Zyrtarët e qytetit kishin marrë një ankesë dhe thanë se plani i djalit 12-vjeçar shkelte Kodin Ushqimor të Massachusettsit.
“Isha i befasuar dhe i zhgënjyer”, tha Danny në lidhje me letrën që mori. “Nuk e kuptoj pse, kur ka kaq shumë kioska limonade dhe ato nuk mbyllen”.
Nëna e Dannyt, Nancy Doherty, e cila e kishte inkurajuar të birin të hapte stendën për sa kohë që gjysma e të ardhurave do të dhuroheshin për bamirësi, ishte gjithashtu e befasuar nga kjo situatë, raporton AP, transmeton Klan Kosova.
Përkundër mbylljes së stendës, Danny vendosi të shpërndajë akulloren falas dhe të pranojë donacione për ekipin e hokejit “Boston Bear Cubs”, i cili përbëhet nga lojtarë me aftësi të kufizuara fizike dhe zhvillimore, përfshirë vëllanë e tij që është autik. Ky veprim bëri që iniciativa e lagjes të shpërthente dhe të bëhej temë diskutimi në Norwood, një qytet në periferi të Bostonit.
Ditën e parë që dhanë akullore falas, furnizimet përfunduan për 10 minuta dhe u mblodhën 1,000 dollarë. Me kalimin e kohës, lajmi për këtë nismë u përhap dhe historia e Danny-t mori vëmendjen e medias lokale, duke nxitur shumë biznese lokale të organizojnë fushata për mbledhje fondesh për ekipin e hokejit.
Një nga këto fushata u organizua nga Furlong’s Candies në bashkëpunim me një radio stacion në Boston, ku u mblodhën 3,600 dollarë në një ditë kur radhët e klientëve shtriheshin deri jashtë dyqanit.
“Danny po përpiqej të bënte diçka të mirë për ekipin e vëllait të tij”, tha Nancy Thrasher, bashkëpronare e dyqanit. “Ata kanë nevojë për shumë më tepër pajisje… Ishte një situatë e përsosur për ne që të përfshiheshim”.
Ndërkohë, zyrtarët e qytetit deklaruan se kishin marrë mesazhe urrejtjeje dhe kërcënime për shkak të këtij incidenti, duke sugjeruar se situata ishte keqinterpretuar nga media. Ata argumentuan se familja kishte shitur akullore të bërë në shtëpi më parë dhe e kishte promovuar atë në rrjetet sociale. Letra, sipas tyre, u dërgua vetëm pas marrjes së disa ankesave dhe përpjekjeve të pasuksesshme për të kontaktuar me familjen — diçka që familja Doherty e kundërshton.
Në fund, për ekipin e hokejit u mblodhën rreth 20,000 dollarë – shumë më tepër sesa shpenzimet vjetore të klubit.
Ky fond duhet të sigurojë që klubi të jetë në një gjendje financiare të qëndrueshme për dekadat e ardhshme.
“Reagimi i komunitetit na ka mahnitur”, tha John Quill, drejtor dhe trajner i Boston Bear Cubs, teksa pranonte një çek nga një grup automjetesh në shtëpinë e familjes Doherty.
“Ka shumë njerëz të mirë atje”, shtoi ai. “Danny frymëzoi shumë njerëz të bëjnë mirë dhe të jenë të sjellshëm dhe të na ndihmojnë”. /Katror.info
Përgatiti:
