BBC – Superylli i muzikës pop, Dua Lipa, ka thënë se “ndjehet sikur dy anët e mia tashmë janë bërë një” pasi iu dha nënshtetësia e Kosovës.
Këngëtarja, e lindur në Londër nga prindër kosovarë-shqiptarë, ka jetuar për një periudhë të shkurtër në Prishtinë nga mosha 11-vjeçare, kur prindërit e saj u kthyen pas shpalljes së pavarësisë së Kosovës.
Presidentja Vjosa Osmani, e cila udhëhoqi ceremoninë, e cilësoi si një “nder” dhënien e nënshtetësisë për Lipën, duke e quajtur atë “një nga figurat më ikonike kulturore në historinë e vendit tonë”.
Mundesh me e lexu edhe…
Në një deklaratë, Lipa shtoi: “Kjo e plotëson dyzimin që gjithmonë e kam pasur brenda vetes. E dua këtë vend dhe kjo ka një domethënie të madhe për mua dhe familjen time.” Duke shpërndarë fotografi nga ceremonia në X, Osmani shkroi: “Dua dhe Kosova kanë qenë gjithmonë të pandashme. Nga skenat më të mëdha të botës deri te zemrat e miliona njerëzve, ajo e ka bartur historinë tonë me forcë, krenari dhe hijeshi.
Mirënjohja jonë është e pafundme për gjithçka që Dua ka bërë dhe vazhdon të bëjë për Kosovën.”
“Thesari i Kosovës – mirë se u ktheve në shtëpi,” shtoi ajo në një postim tjetër.
Aktualisht, Lipa ndodhet në Kosovë për festivalin tre-ditor Sunny Hill, të cilin e hapi të premten si kryeartiste.
Ajo shpesh ka folur për dashurinë ndaj vendit dhe ka themeluar një fondacion që ndihmon komunitetet më të cenueshme në Kosovë.
Këngëtarja e albumit Radical Optimism u prit në ceremoni nga kori i fëmijëve, të cilët kënduan një version të këngës së saj hit Levitating.
I pranishëm ishte edhe ambasadori britanik në Kosovë, Jonathan Hargreaves, i cili postoi një fotografi duke buzëqeshur me Lipën në X dhe tha se Britania e Madhe dhe Kosova krenohen ta quajnë këngëtaren e famshme “njërën prej tanëve”.
Tani, Lipa ka nënshtetësinë e Britanisë, Shqipërisë dhe Kosovës.
Në vitin 2022, ajo u pajis edhe me nënshtetësinë shqiptare për promovimin që i ka bërë vendit përmes muzikës dhe famës së saj. Po atë vit, Presidentja e Kosovës i dha edhe titullin Ambasadore Nderi e Kosovës.
Ajo e cilësoi si një “nder dhe privilegj” mundësinë për të përfaqësuar vendin e saj në mbarë botën dhe për të vazhduar punën dhe përpjekjet globale.
Pas performancës së saj në Sunny Hill të premten, Lipa shkroi në Instagram: “Ta ndaj këtë natë me ju të gjithëve, në qytetin që më ka formësuar, e rrethuar me kaq shumë energji, gëzim dhe krenari… është e vështirë ta shpreh me fjalë çfarë do të thotë kjo.”
Ajo themeloi festivalin muzikor në vendlindjen e prindërve së bashku me të atin në vitin 2018.
Vitin e kaluar, ajo shpjegoi se festivali u krijua “për ta ndryshuar retorikën mbi Kosovën dhe perceptimin se është vetëm një vend i shkatërruar nga lufta”.
Kosova shpalli pavarësinë nga Serbia në vitin 2008. Pavarësia e Kosovës është njohur nga Britania e Madhe, SHBA dhe vendet e tjera të G7, si dhe nga shumica e shteteve të BE-së, por jo nga Spanja e Greqia. Megjithatë, Serbia vazhdon të mos e njohë Kosovën, ashtu si shumica e serbëve etnikë brenda saj. Rusia, Kina dhe disa shtete afrikane e latino-amerikane gjithashtu nuk e kanë njohur pavarësinë e saj/BBC/ Katror.info
Përgatiti:
