Kush do të fitojë garën për teknologjinë e baterive dhe bazën me kosto efektive të automjeteve elektrike? Sot, Tesla është përpara shumë prodhuesve të makinave, por “sezoni i gjuetisë” për Teslën ka filluar.
BMW pretendon se tashmë është duke e zënë dhe tejkaluar Teslën. Zyrtarë të gjigantit bavarez thonë për Autonews se BMW është tashmë përpara Tesla me qelizat e reja të mëdha të baterive dhe boshtin e ri mekanik Neue Klasse.
Arsyeja kryesore, siç u tha, është se BMW do të përgjysmojë koston e baterive për makinat elektrike me qelizat e saj të reja. Bateria e re e përmirësuar e litium-jonit do të ketë 30 për qind efikasitet më të lartë të energjisë dhe shpejtësi karikimi, ndërsa kostot e prodhimit janë vetëm 50 për qind e kostove të sotme.
Bateritë e reja cilindrike të BMW-së kanë një diametër prej 46 milimetrash dhe janë të ngjashme me kanaçet e birrës. BMW do të punojë me dy lartësi të ndryshme baterish, njëra prej 95 milimetrash dhe tjetra prej 120 milimetrash.
Këto bateri kanë një përmbajtje më të ulët kobalti në katodë, ndërsa anoda ka më shumë silikon se bateritë e sotme. Plani është që të përdoret një pjesë e madhe e materialeve të ricikluara dhe të reduktohen emetimet e dioksidit të karbonit me 60 për qind në krahasim me bateritë e sotme.
BMW prezantoi konceptin e makinës së saj të ardhshme elektrike, Neue Klasse, në Motor Show në Mynih në shtator. Bazat e reja mekanike të automjetit do të ulin kostot e prodhimit në krahasim me makinat e sotme BMW, të cilat janë ndërtuar mbi një platformë hibride që mund të mbajë motorë me djegie të brendshme dhe motorë elektrikë.
Neue Klasse përfaqëson një dizajn të ri dhe një mënyrë të re të prodhimit të makinave elektrike për BMW. Siç thotë kompania, do të jetë një përparim i madh teknologjik për BMW-në. /Katror.info