Nga brigjet e arta të Egjeut deri në kodrat e saj, Gadishulli i Bodrumit në jugperëndim të Turqisë mbart mbi 3 mijw vjet histori. Dikur i njohur si Halikarnasi – një nga qytetet më të lavdishme të botës antike, sot është një miks i rrallë mes trashëgimisë arkeologjike, kulturës mesdhetare dhe turizmit elitar.
Historia e Bodrumit nis rreth shekullit XII p.e.s. me qytetin e lashtë Pedasa, dhe vijon me themelimin e Halikarnasit nga grekët dorianë në shekullin IX p.e.s. Në shekullin IV p.e.s., nën sundimin e mbretit Mausolus, ndërtohet Mauzoleu i Halikarnasit – një nga Shtatë Mrekullitë e Botës së Lashtë. Ky monument madhështor, me lartësi afro 45 metra, u shkatërrua nga tërmetet mes shekujve XII dhe XV, por mbetjet e tij ruhen ende sot, shkruan CNN.
Porta e Myndosit, Teatri Antik dhe rrugët e gurta që çojnë në ishullin e Lepurit janë dëshmi të gjalla të një qyteti që sfidoi kohën dhe pushtuesit – nga Aleksandri i Madh, tek romakët dhe më pas Bizanti.
Mundesh me e lexu edhe…
Në vitin 1402, Kalorësit e Shën Gjonit ngritën Kalasën e Bodrumit, duke përdorur gurë nga mauzoleu i shkatërruar. Ky fortifikim, sot një nga atraksionet më të vizituara, strehon Muzeun e Arkeologjisë Nënujore, ku ekspozohen anije bizantine dhe thesare të zhytura.
Shekujt XVI-XVIII gjejnë Bodrumin nën sundimin osman, me një zhvillim të madh në ndërtimin e anijeve dhe mbrojtjen nga sulmet pirate. Në kodrat mbi Gjirin e Gumbet-it u ndërtuan mullinjtë e famshëm me erë, simbol i qytetit deri më sot.
Në vitet ’20, shkrimtari Cevat Şakir Kabaağaçlı, i njohur si “Peshkatari i Halikarnasit”, e promovoi zonën tek elita kulturore turke dhe krijoi konceptin e “Blue Cruise” – lundrimeve turistike përgjatë Rivierës Turke.
Nga vitet ’50 deri ’70, ekonomia vendase bazohej në sfungjerë dhe kultivimin e agrumeve – veçanërisht mandarinave të Bodrumit, të cilat mbeten një markë lokale. Në këtë periudhë, bregdeti ishte i lirë dhe tokat e detit konsideroheshin më pak të vlefshme se fushat pjellore të brendësisë.
Hapja e Aeroportit Ndërkombëtar Milas-Bodrum në 1997 solli një bum turistik, duke tërhequr si turistë turq të pasur, ashtu edhe vizitorë evropianë me paketa “gjithçka ekskluzive”.
E fshehur në një skaj të gjirit në perëndim, përballë resortit të ardhshëm Bvlgari (që pritet të hapet në vitin 2027), ndodhet Villa Maçakizi, ku një natë kushton 50,000 dollarë.
Sot, Bodrumi është sinonim i luksit. Nga marinat e Yalıkavak-ut, ku ankorohen superjahtet, tek vilat në Cennet Koyu, ku nata kushton dhjetëra mijëra euro, gadishulli është kthyer në një nga destinacionet më elitare të Mesdheut.
Marka të njohura ndërkombëtare po hapin rezorte gjigante, me spa prej mijëra metrash katrorë, ku mysafirët lëvizin me karroca golfi.
Ndërsa Bodrumi njihet më shumë për shkëlqimin dhe luksin e tij, një qetësi rurale gjendet gjithashtu në hapësirën e tij prej 650 kilometrash katrorë, veçanërisht në kodrat dhe malet e egra e pak të eksploruara./AP/Katror.info
