Më 16 korrik në orën 20:00, në kanalet Sky 109 dhe Virgin 114, pjesë e familjes UKTV dhe BBC Studios, u zhvillua premiera e serialit britanik “BOOKISH”. Ky projekt dramatik sjell në fokus një periudhë të rëndësishme historike dhe shënon një lidhje të veçantë me historinë shqiptare përmes portretizimit të Princeshës Nafije Zogu, motrës së Mbretit Ahmet Zogu.
Rolin e Princeshës Nafije e interpreton aktorja shqiptare Rina Krasniqi, e cila në këtë projekt jep jetë një figure kyçe historike, duke sjellë për publikun ndërkombëtar kompleksitetin dhe pasionin e asaj periudhe. Rina shprehu emocionin e saj për mundësinë e jashtëzakonshme për të punuar me aktorë legjendarë si Mark Gatiss (“Sherlock”), Joely Richardson (“101 Dalmatians”), Polly Walker (“Bridgerton”), Elliot Levey (“Peaky Blinders”) dhe Angeliki Papoulia (“Dogtooth”).
“Ka qenë një nder i pa përshkruar të luaj rolin e një figure kaq të rëndësishme historike dhe të jem pjesë e një ekipi kaq të jashtëzakonshëm,” tha aktorja Krasniqi. Ajo shtoi se projekti vlerëson tregimet reale dhe është krenare që historia shqiptare po prezantohet në një platformë ndërkombëtare.
Mundesh me e lexu edhe…
Atmosfera në setin e xhirimeve ishte plot ngrohtësi dhe humor, me elemente të kulturës shqiptare që u përfshinë në mënyrë të veçantë. Rina kujtoi me buzëqeshje: “Ne sollëm pak më pak çaj… dhe shumë më shumë raki!”, duke reflektuar lidhjen e ngushtë mes aktorëve dhe frymën e bashkëpunimit.
“BOOKISH” përbën një bashkim të rrallë të historisë, kulturës dhe artit në një rrëfim me përmasa ndërkombëtare, duke sjellë jo vetëm një ngjarje historike, por edhe një pjesë të identitetit shqiptar në një nga platformat më të mëdha televizive në botë. Ky serial pritet të tërheqë vëmendjen e një audience globale dhe të forcojë urat mes publikut shqiptar dhe atij ndërkombëtar./Kultplus/Katror.info
