Rreth 1 milion euro do të investohen në Ndërmarrjen Shoqërore “Sharr Planina” në Brezovicë, pas miratimit nga Bordi i Agjencisë Kosovare të Privatizimit (AKP) të kërkesës së menaxhmentit për investime në këtë ndërmarrje që është nën administrim të drejtpërdrejtë të agjencisë.
Në njoftimin e AKP-së thuhet se: “Bordi shqyrtoi dhe miratoi propozimin e Menaxhmentit lidhur me aprovimin e investimeve në shumë prej 998,000.00 € në NSh ‘Sharr Planina’ – Brezovicë. Investimet përfshijnë modernizimin dhe sanimin e teleferikëve dhe pajisjeve të skijimit, renovimin e Hotelit ‘Molika’ dhe hapësirave akomoduese, implementimin e sistemeve moderne të pagesës dhe menaxhimit elektronik, si dhe zgjerimin e ofertës për turizëm veror”, përcjell RTK Live.
Ky vendim u mor gjatë mbledhjes së fundit të bordit të AKP-së, ku u diskutuan dhe u miratuan edhe çështje të tjera me rëndësi për proceset e privatizimit dhe forcimin e qeverisjes institucionale.
Mundesh me e lexu edhe…
Gjithashtu, Bordi aprovoi ndryshimet në Rregulloren 03/2025 për qiradhënien e aseteve të ndërmarrjeve shoqërore. Qëllimi i këtyre ndryshimeve është rritja e efektivitetit në zbatim, forcimi i mekanizmave të kontrollit dhe sigurimi i një menaxhimi më të përgjegjshëm dhe të qëndrueshëm të të hyrave nga qiratë dhe të aseteve publike.
Në të njëjtën mbledhje, Bordi miratoi kërkesën e Komunës së Podujevës për largimin e njësive nr. 45 dhe 46 të ndërmarrjes KB “Flora” në Pakashticë të Poshtme, nga Shitja e Aseteve përmes Likuidimit (ShAL 72), që pritet të mbahet më 28 maj 2025. Kjo u bë me arsyetimin se Komuna do të nisë procedurat e shpronësimit me qëllim që ato prona të kalojnë në pronësi komunale, për nevoja me interes të përgjithshëm.
Po ashtu, Bordi aprovoi valën e re të likuidimit ShAL 73, që përfshin 101 asete dhe që do të publikohet së shpejti.
Ndër vendimet tjera të miratuara ishte edhe ajo për aprovimin e kërkesës së Kompanisë Rajonale të Ujësjellësit “Hidromorava”, për dhënien e pëlqimit që ndërlidhet me lëshimin e lejes ndërtimore në kuadër të projektit për ndërtimin e rezervuarit të ujit “Floës”.
Bordi po ashtu miratoi kërkesën për qiradhënie direkte të aseteve për kompaninë “Kosmonte Foods” Sh.p.k., bazuar në një vendim të mëhershëm të Qeverisë, të cilin e ka validuar edhe Kuvendi i Kosovës më shumë se tre vite më parë./Katror.info
