Sipas njoftimit për media nga AKP, ndryshimet kryesore përfshijnë: trajtimin e aseteve me mospërputhje ndërmjet të dhënave tekstuale, grafike dhe gjendjes faktike në terren; aseteve që pas pesë raundesh tenderimi, nuk kanë gjeneruar oferta ose kur ofertat janë nën çmimin minimal; si dhe konsolidimin e dokumentacionit të shitjes.
“Këto përmirësime synojnë thjeshtimin e procedurave, rritjen e transparencës dhe efikasitetit, si dhe përputhshmërinë me kërkesat ligjore dhe praktikat më të mira institucionale”, thuhet në njoftim.
Në këtë mbledhje, Bordi i AKP-së ka aprovuar kërkesën e Komunës së Kamenicës për largim të dy aseteve nga vala SHAL 74 për shkak të interesit publik, ato njësi janë Njësia 14 – Agroprodukti Toka në Hodonovc (Lot A) dhe Njësia nr. 28 – Zhivko Vasiq Toka në Petroc (Lot D).
“Bordi ka aprovuar raportin e Komisionit të banesave të ndërmarrjeve shoqërore, ku 1 raport është aprovuar, 2 refuzuar, dhe 1 rast është shtyrë për sqarime shtesë. Më pas, Bordi shqyrtoi dhe miratoi kërkesën e Këshillit Gjyqësor të Kosovës për plotësim-ndryshim të Memorandumit të Mirëkuptimit ndërmjet KGJK-së dhe Agjencisë, që parasheh shtimin e numrit të zyrtarëve ligjorë të mbështetur nga AKP në Dhomën e Posaçme të Gjykatës Supreme, nga 20 në 25. Këta zyrtarë do të angazhohen në çështjet ligjore dhe administrative që lidhen me procesin e likuidimit të Ndërmarrjeve Shoqërore, me qëllim të rritjes së efikasitetit dhe përshpejtimit të trajtimit të lëndëve aktive në Dhomën e Posaçme”, thuhet tutje në njoftim.
Bordi i AK-së mori vendim për fillim të likuidimit të ndërmarrjeve MIT052 Njësia Punuese “Bar Bilje”, aseti në Kopaonik dhe PRN038 Kooperativa Zejtare Banesore “Bashkimi” – Prishtinë. Për dy ndërmarrje tjera si GJI142 KB “Novobërda” – Novobërdë dhe GJI015 KB “Cërnica”, Cërnicë – Gjilan u njoftua me Raportet Përfundimtar të procesit të likuidimit që në procedurë të rregullt do të dërgohen në DhPGjS ku dhe do të shqyrtohen për përmbylljen e ndërmarrjeve.
“Bordi ka aprovuar dy kërkesa të Autoritetit të Likuidimit për heqje dorë nga asetet për shkak të interesit publik, si në vijim: 1) Kërkesa për heqje dorë 5314-3 dhe 5314-4 ZK Gjakove jashtë-qytet, asete të NSh “Ereniku-Prodhimtaria Primare” – në këtë parcelë janë varrezat e martirëve në Çabrat; dhe 2) Kërkesë për heqje dorë nga parcela 01200-0 ZK Decan, pronë e NT Agimi, Gjakovë në këtë parcelë gjendet lapidari i dëshmorëve të kombit në qendër të qytetit”, nënvizohet tutje në njoftim./RTK/Katror.info
