Kampanja e korrje-shirjes së grurit po zhvillohet me intensitet në gjithë Kosovën, ku sipas Ministrisë së Bujqësisë këtë vit janë mbjellë mbi 74,700 hektarë me grurë. Rendimentet pritet të jenë afërsisht 4,800 kilogramë për hektar, një shifër e ngjashme me vitin e kaluar, që nga ana e fermerëve konsiderohet e kënaqshme.
Megjithatë, fermerët shprehen të pakënaqur me çmimin e ulët prej 18 cent për kilogram, që ofrohet nga mullisët, duke vënë në dukje se kjo nuk mbulon kostot e larta të prodhimit. Një prej tyre, fermeri nga Lipjani, Valon Vehapi, që ka mbjellë mbi 120 hektarë me grurë, tregon se pritjet për rendiment janë të mira, me prodhim mesatar prej 6 deri në 6.5 ton për hektar. Por çmimi aktual nuk përballon as koston për një hektar, që sipas tij arrin deri në 1,200 euro.
Nga Ministria e Bujqësisë, përmes një përgjigjeje për Radio Kosovën, theksohet se gjendja e grunajave është e mirë dhe rendimenti pritet të jetë i kënaqshëm, i përafërt me vitin e kaluar, rreth 4,870 kilogramë për hektar.
Mundesh me e lexu edhe…
Ndërkohë, profesori universitar i bujqësisë, Imer Rusinovci, thekson se prodhimi i grurit do të jetë mesatar dhe i pamjaftueshëm për nevojat e brendshme të Kosovës. Ai parashikon se Kosova do të vazhdojë të ketë nevojë për import të grurit, siç ka ndodhur edhe vite më parë.
Në këtë situatë, fermerët ballafaqohen edhe me një problem shtesë: zjarret e fundit që kanë përfshirë pjesë të ndryshme të vendit kanë shkatërruar sipërfaqe të konsiderueshme të mbjella me grurë, duke shkaktuar dëme të mëdha. Deri më tani, nuk ka sinjale për kompensim për fermerët që kanë humbur prodhimin e tyre nga “buka e motmotit”, duke rritur pasigurinë në këtë sektor jetik të ekonomisë vendore.
Bujqit kërkojnë vëmendje dhe masa mbështetëse për të përballuar sfidat që po kalojnë dhe për të siguruar prodhim të qëndrueshëm të grurit në vitet në vijim./Katror.info
