Rrugëtimi i edicionit të 15-të të Festivalit ndërkombëtar “Chopin Piano Fest Prishtina” ka nisur më 8 maj dhe do të vazhdojë deri më 9 qershor, duke ofruar për publikun kosovar një përvojë të jashtëzakonshme muzikore. Gjatë një muaji, në skenën e këtij festivali do të performojnë pianistë të njohur ndërkombëtarisht, të cilët sjellin tingujt e muzikës klasike në zemër të kryeqytetit.
Në një intervistë për RTK, Besa Luzha, drejtoreshë menaxhuese e festivalit, theksoi rëndësinë e këtij organizimi për skenën muzikore në Kosovë. Ajo nënvizoi se një nga arsyet për të zgjatur një muaj këtë festival është prezenca e artistëve të rrallë dhe të njohur në arenën botërore, të cilët rrallë kanë rast të performojnë live në Prishtinë.
“Edhe pse mund t’i dëgjojmë në platformat online, koncertet live ofrojnë një emocion krejt tjetër, që është e veçanta dhe e bukura e këtij festivali. Në vendet e tjera bileta për këto koncerte kushton shumë, por ne i sjellim këta artistë me rang botëror dhe audienca jonë i shijon pa pagesë,” tha Luzha.
Mundesh me e lexu edhe…
Drejtoresha shtoi se festivali tashmë ka fituar një emër të njohur, çka e lehtëson sjelljen e artistëve më të mirë nga skenat botërore. Përzgjedhja e artistëve bëhet nga profesoresha dhe drejtoresha artistike Lejla Pula, e cila ka mbi dyzet vjet përvojë si pianiste dhe njohje të thellë të muzikës klasike.
Në këtë edicion, në skenën e festivalit do të ngjiten mbi 25 artistë nga vende të ndryshme, përfshirë Kosovën, Shqipërinë, Francën, Austrinë, Lituaninë, Rumaninë, Italinë, Shtetet e Bashkuara të Amerikës dhe Kubën.
Festivali do të përmbyllet më 9 qershor 2025 me koncertin e pianistit britanik të njohur, Peter Donohoe, i cili pritet të sjellë një mbyllje magjepsëse të këtij edicioni./Katror.info
