Ndërsa mjetet statistikore u përmirësuan ndjeshëm gjatë dekadave të fundit, studiuesit ishin gati të shtronin pyetjen: ‘Cila është ngjyra juaj e preferuar?’
Mesa duket, të gjithëve u pëlqente ngjyra e kaltër. Studimet që në vitin 1941 treguan se nuancat e kaltra ishin më të preferuarat.
Këtë vit madje, ngjyra më e preferuar në botë u deklarua si një nuancë e veçantë e kaltër jeshile bazuar në një sondazh me 30,000 persona në 100 vende të ndryshme të botës.
Një tjetër pyetje e shtruar nga psikologët ishte pse ekzistonte kjo preferencë.
Sipas hulumtimit të kryer nga psikologët Stephen E. Palmer dhe Karen Schloss, përgjigja nuk gjendet në ADN-në tonë. Studimi i tyre supozon se preferenca e një personi për një ngjyrë të caktuar mund të përcaktohet duke vlerësuar se sa shumë i pëlqejnë atij objektet që e lidhin me atë ngjyrë.
Prirja juaj për portokalli, për shembull, varet nga mënyra se si ndiheni për kungujt dhe karrotat, ndërsa ngjyra e gjelbër mund të kenë lidhje me ndjesitë tua për gjethet, brokolin apo edhe paratë që kanë këtë ngjyrë!
“Rezulton se nëse shikoni të gjitha gjërat që lidhen me ngjyrën e kaltër, ato janë kryesisht pozitive. Është vërtet e vështirë të mendosh për gjëra negative që kanë ngjyrë të kaltër,” shpjegon Schloss, një asistent profesor i psikologjisë në Universitetin e Wisconsin-Madison.
Ne e lidhim këtë ngjyrë kryesisht me qiellin dhe ujin, duke e ngritur preferencën mesatare për të më lart se pjesa tjetër e ngjyrave.
Ashtu si kjo ngjyrë që del gjithmonë në krye në sondazhe, ngjyrat e verdha të errëta pothuajse gjithmonë përfundojnë në fund. Në mënyrë tipike, ngjyrat e vjeshtës – e verdha e artë, kafe, e kuqe e errët etj, – janë më pak të pëlqyera.
Por sondazhet e kryera në vjeshtë zbulojnë një preferencë të shtuar për këto nuanca të errëta dhe të ngrohta, kur pjesëmarrësit i lidhin më së afërmi ato me gjëra festive të kësaj stine.